«Айланай» фольклорэтнографиялык биюв ансамблининъ солисткасы Аминат Сариева 1977-нши йылдынъ караша айынынъ 7-нши куьнинде дуныяга энген эди. Ол Махачкаладагы культпросвет училищесин уьстинликли окып битирген, оннан сонъ ис аьрекетин патшалык саз алатлар оркестринде эм соны ман бирге Батыр-Мурза авыл маданият уьйинде методист аьрекетин бардырган. Ол яшавынынъ ызгы эки айы ишинде «Айланай» ансамблинде де ис аьрекетин бардырды. Аминат куьн сайын куллыкка ушкан кустай болып келетаган эди.

    – Мен сизге «звезда» болмага келдим, – деген эди ол бизге келген шагында. Ол юлдыз болды, тек, оькинишке, яркырады да, соьнди. Аминат бир неше концертлерде катнасып, оьз оьнерин коьрсетти. «Кайтар мени» деген Кадриядынъ соьзлерине, У.Ваисов анъ салган йырды Аминат, йырды янъыдан онълаган М.Ваисовтан разылыгын алып, Батыр-Мурза авылында, Кадриядынъ эстелигине багысланган кешликте, кайта-кайта сол йырды биринши эм сонъгы кере йырлады.

     «Нешик озды йырынънынъ премьерасы?», – деген соравга: «Халк йылады», – деп явап берди. Аминаттынъ домбырада ойнап уьйренмеге де ниети бар эди, оькинишке, онынъ коьп уьмитлери яшавга шыкпай калды.

Каты келген хабарынъ

Юреклерге буз куйды.

Уьмит толган яшавынъды

Соравсыз кате бузды.

Конъырав сесли бил-бил кус,

Неге йырынъ уьзилди?

Занъыраган шокырак,

Неге сесинъ бузылды?

Яткан еринъ ярык болсын, Аминат,

Сират коьпир сага енъил коьшилсин!

Йырлар суьйген, элди суьйген янынъа

Еннет капы кенъ яйылып ашылсын!

     «Айланай» патшалык этнографиялык биюв ансамблининъ коллективи йырлавшысы, конъырав сесли Аминат Сариевадынъ кателенип, замансыз дуныядан таювы ман байланыста каты кайгырувын билдиреди, онынъ аьелине, кардашювыкларына, увылы Аланга (ол анасындай болып, йырлайды эм домбырада да ойнайды) бассавлык йорайды. Кудай баьрине де куьш-куват берсин бу сынавды коьтермеге.

«Айланай» патшалык фольклор-этнографиялык ансамблининъ ис коллективи.