Сол куьн мунда йыйылган халкка Кадриядынъ 70 йыллыгына багысланган художестволы-документальлик фильмди де коьрсеттилер. Сонынъ режиссер-постановщиги – Эльмира Юнус кызы Кожаева. Фильм бек аьруьв салынган. Биз фильмди карап, алдын бир де эситпеген, коьрмеген коьп затлар акында эситтик, коьрдик. Кадрия бизге янъыдан тувгандай, аьли де арамызда юргендей болып сезилди. Аьр бир эскеруьв бизим юрегимизге тийди, бизди яшавга баскаша карамага уьйретти. Кадрияды халкымызга ол тири заманында сыйлап, коршалап билмеге керек экенимизди анълатты!..

    Савбол Эльмира! Сага бу фильмди аьзирлемеге аьр бир яктан коьмек эткен аьдемлердинъ баьрине де савбол айтаман. Сол фильмди аьзирлевде катнаскан аьдемлерге, артистлерге, операторларга, суьвретшилерге, фотосуьвретшилерге эм сондай баскаларга уьйкен уьстинликлер, ден савлык йорайман. Солай ок бизим данъклы поэтессамыздынъ бала заманындагы ролин ойнаган кишкей актрисамыз Лейла Акманбетовады айырым ак юректен кутлап, ога разылыгымды билдиремен. Сен де сондай Ногай Элинъе атагынъ-данынъ шыккан кыз бол!

Б.Бариева,
Терекли-Мектеб авылы.