Домбыра – буьгуьнлерде аьр уьйде тувыл, бир авылларда, атайлар айткандай, «ат оьлтирип излесенъ де, табылмай коймага болады», тек уьйкен суьйинишке, бар сондай ясларымыз, Акынымыз, халкымызга сол саз алатымыз, байыр миллетимиздики экенин муттырмага бермейтаган, кайтип болса да, яслар арасында таралтпага шалысатаганлар.

      Ызгы заманларда домбыра ман аьвлигип, маьнели каьр шегип баслаган ясларымыз да бар, Ногай район еринде бир неше онйыллыклар етимисли аьрекетин бардыратаган С.Батыров атындагы саниятлар мектебинде домбырага уьйретедилер, олардынъ тербияланувшылары республика эм онынъ тысларында да етимислерге етисип, савгалы орынларды аькеледилер.

      Янъыларда, йылдынъ басланувы ман бизди аты бизим газета окувшыларымызга таныс Кадрия Джумакова тагы да оьз етимиси мен суьйинтти.
Кадрия кишкейиннен домбыра ман аьвлигип, оьз билимин куьннен-куьнге оьстирип келеди, ол саниятлар мектебининъ окувшысы болып, коьп район, республикалык шараларда катнасып, дайым савгалы орынларга етисип кайтады. 

     Буьгуьнлерде Кадрия Нальчик каласында «Таланты Евразии» деген III Халклар ара саниятлар олимпиадасында катнасып, алтын медальге эм биринши дережели дипломга тийисли болды. Кадриядынъ талабы куьннен-куьнге оьседи, соны оьстируьв уьстинде онынъ окытувшысы Адильхан Сагынбек увылы Менласанов та оьз билимин аямай ислейди. Биз оларды – окытувшы Адильхан Менласановты эм Кадрия Джумаковады ак юрегимизден етискен уьстинлиги мен кутлаймыз, алдыда аьли де йогары ушувларды, бийикликти йораймыз. Атларынъыз тек Россия элинде тувыл, шет эллерде озатаган шараларда да ийгилик пен айтылганды йораймыз.

Г.Сагиндикова, 
РФ Журналистлер союзынынъ агзасы.
Суьвретте: Кадрия Джумакова окытувшысы Адильхан Менласанов пан.