Янын берип аьрекет этеди

Йогары окув ошагын кызыл дипломга окып битирип, тувган авылына кайтады. Мунда яс кыскаяклы эсап дерисининъ окытувшысы болып ислеп баслайды. Ислей келип, ол, Адильхан Солтанмурат улы Янмурзаев пен танысып, уьйкен аьел курып, бес балады асырап, саклап, аьр бирисине билим берип, аякларына тургысткан. 

Медина Залимхан кызы бир неше йыл узагында Калинин авыл мектебинде эсап дерисиннен окытувшы болып ислеген. Ногай районында атаклы окытувшы деп саналган. Ислеген йыллары ишинде куллык ягыннан коьп уьстинликлерге етискен. Олай деп айтувымыз, коьп йыллар узагына яваплы ислегени эм ийги тамамларга етискени уьшин «РФ билимлендируьв алдышысы» деген коькирек медаль мен, туьрли Сый грамоталар, разылык хатлар ман савгаланган. Медина Залимхан кызынынъ педагогикалык аьрекетининъ бас оьктемлиги эм сырагысы – онынъ окувшылары.

Окытувшы 45 йыл узагында 20-дан артык окувшылар выпускын уьйкен яшав йолына салган. Онынъ окыткан окувшыларынынъ аьр бириси туьрли тармакларда ислейдилер. Мектебте болган окувшылар ман йолыгысларга да келедилер. Ол оьз ойлары ман окувшыларына боьлиседи. Медина Залимхан кызы ис йолдаслары эм ата-аналар сырасында сый-абырай казанган, аьли де мектебте болган шараларга конакка келеди. Ол бу куьнлерде тийисли тыншаювда болса да, мектеб пен тар байланыс тутады. 

Биз, Калинин авылынынъ окытувшылары, мектебимизде сондай талаплы, куллыксуьер, атаклы, сый-абырайлы ис йолдасымыз бан оьктемсиймиз. Янъыларда, 2019-ншы йылдынъ 1-нши январинде, Медина Залимхан кызы 70 йыллык мерекесин белгиледи. Биз сизди сыйлы мерекенъиз бен кутлаймыз.
Етпис йыллык мерекенъиз
Той болганын суьемиз.
Ийги куьнде сизи мен
Куванышты боьлемиз.
Ден савлыгынъ берк болсын
Картаймасын юрегинъ
Аьр куьн сенинъ юзинъде
Наьсип нуры яйнасын!

Г.Янгазиева, 
Калинин авыл мектебининъ окытувшысы.
Суьвретте: М.Янмурзаева.