Ниетлеримиз толды

А.Джанибеков атындагы мектебте капиталлык ярастырув куллыклар ол ашылганлы бери 1979-ншы йылдан алып этилинмеген. «100 школа» проекти янъы амаллар ашты, эм ол аркалы мыратлар толды демеге де болаяк. Биз, бу мектебтинъ етекшиси Курасхан Ярикбаева ман йолыгысып, программа бойынша юритилген ярастырув куллыклар акында сорадык.

– «100 школа» проекти бойынша ярастырув куллыклар мунда озган 2018-нши йылдынъ караша айынынъ ызында басландылар. Ярастырув куллыклар медицина кабинетлериннен басландылар. Олардынъ полы авыстырылды, тамына ярасык плита ябыстырылды, янъы пластик терезелер салынды, солай ок врачтынъ эм процедуралар кабинетлерине айырым эсиклер ясалды. Баьри санэпидстанция демевлеген аьллер туьзилди. Сога коьре бу йыл биз медицина кабинетине лиценция алмага ниетленемиз.

Бизим мектебтинъ алды ягына караган терезелер янъы болган болса, каралдысына караганлары агаш эм эски эдилер. Сога коьре бир кабинетлерде сувык болган, эндиги сол 61 терезе авыстырылган эм аьли, кыс куьнине карамастан, кабинетлерде йылы. Тагы да кериде туратаган, керекли аьллерде кулланылатаган мектебтинъ арт бетиндеги агаш эсиклер, солай ок мектебке киргенде кулланылган бас эсиклер де янъыга авыстырылдылар. Янъы муьлк те аькелинген, 150 парта эм 300 олтыргышлар, 10 магнит такталар.

Баьрин де кызыксындырган эм тынышсызландырган спортзалдынъ аьли акында да айтып озайым. Аьли мунда физкультура дерислер озадылар, юритилген тергевлерге коьре оны кулланмага ярайды. Спортзалда ярастырув куллыкларды этуьвди билимлендируьв министерствосы оьзининъ мойынына алган. Мунда озган 2018-нши йылда куллыклар басланмага тийисли эдилер, ама олар уьлгирмедилер. Сога коьре куллыклар бу йыл канътар яде увыт айда басланмага керек. 

«100 школа» проектининъ яшавга шыгарылувын тергеген куьби де аьрекет этти. Сол куьптинъ председатели «Ногайский район» МР-нынъ Ямагат палатасынынъ председатели Эльмурза Саитов, агзалары – «Отдел капитального строительства администрации МР «Ногайский район» МКУ директоры Рашид Аджиков, архитектор Солтанахмет Заретов, Чернобыльшылар советининъ Ногай район боьлигининъ председатели Руслан Кунтувганов, Яшавшыларды социаллык яктан коршалав фондынынъ етекшиси Мавлетдийин Бекбулатов эдилер. Солай ок мектебимизде окыган балалардынъ ата-аналары да, баьриси 7 аьдем комиссиядынъ сырасына кирген»,  – деди Курасхан Джумагельдиевна.

А-Х.Джанибеков атындагы школадынъ етекшиси белгиленген куллыклар юритилер уьшин карыж яктан коьмегин эткен баьрине де оьз разылыгын билдиреди. Айтып озайык, республикалык бюджетиннен А-Х. Джанибеков атындагы мектебине 2 миллион маьнет акша, ерли бюджеттен 100 мынъ маьнет акша шыгарылган, оннан оьзгелей, спонсорлардынъ коьмеги мен 1 миллион маьнет акша йыйналган.

Н.Кожаева.