Шатлыклы аьлде ашылды

     Белгиленген шарада Махачкаладынъ аькимбасынынъ куллыгын кесек заманга юритуьвши Мурад Алиев, СССР КГБ-сынынъ генерал-майоры Омар Муртазалиев эм баскалар катнастылар.
     Мурад Алиев паркта ярастырув куллыклар этилинип басланганша, ямагат ерин оьзлерине алмага суьйгенлер коьп болганын айтты. Тагы да ол Дагестан Республикасынынъ Аькимбасы Владимир Васильевтинъ эм каладынъ администрациясы ман уллы куллык этилингенин, «Кала тоьгереги»  федераллык проекти бойынша 23 каралды эм 5 ямагат ерлер ярастырылганын белгиледи.
     Парк еринде ярастырув куллыклар барысында 37 фонарьлер, 15 тыншаюв олтыргышлар салынган, балаларга ойнамага майдан ясалган, йолга плита тоьселген, табиат тастан булак этилинген, яс тереклер, шешекейлер олтыртылган.
     Эске салып озайык, «Кала тоьгереги» проекти 2016-ншы йылдынъ 17-нши ноябринде йол алган эм 2022-нши йылга дейим яшавга шыгарылмага тийисли. 

Н.Эрежепова.
Суьвретте: шарадан коьринис.