Яс аьдемди тувра йолга салар ниет пен Ногай районы бойынша Россия ОМВД куллыкшылары «студентлер десанты» деп акция озгардылар. Бу акция савлай Россия ОМВД-лар бойынша озгарыладылар.
Ногай районы бойынша ОМВД куллыкшылары ман озгарылган шарада Терекли-Мектеб авылынынъ А-Х.Джанибеков эм Кадрия атындагы мектеблердинъ 10-11-нши класс окувшылары ортакшылык эттилер. Бу куьн аьзирленген шара уьш кезекте оьтти. Биринши кезегинде Ногай район ОМВД куллыкшылары А.Эдильбаев, А.Шабанов, К.Мусаев оьз ойлары ман боьлисти. Аьр бириси оьз ис орынында этетаган борышлары акында хабарладылар. Бу шарадынъ озгарылув ниети акында полиция етекшисининъ орынбасары ООП начальниги, полиция подполковниги А.Эдильбаев анълатты.
«Буьгуьнги яс аьдем полиция куллыгы акында, оьз ыхтыярлары акында билмеге керек», – деди ол.
Йол-юрис йорыкларынынъ тутылмайтаганы, бизде ясларына коьре автокоьлик айдамага ярамайтаган болса да, бизим яслар баьри йорыкларды бузып, сол затка бизде айтылганлай, «ногайшылык пан» коьз юмылатаганы акында ДПС бас инспекторы А.Шабанов хабарлады. Ол аьр бир анълаткан йол-йорыгына мысаллар да келтирди.
«Мине сиз танъла-бирсуьгин мектебти кутараяксынъыз, сизинъ араларынъызда МВД тармагында исин бардырмага суьйгенлер де бар болар, эгер сиз буьгуьн йол-юрис йорыкларды бузып, атынъызга тат тийдирген болсанъыз, МВД тармаганда окувдынъ акында мутпага боласыз, неге десе сизинъ йолынъыз ябык, соны сиз оьзинъиз салган боласыз. Солай ок, баска ерде йол-юрис йорыкларын тутпай яде билмей оьзинъиздинъ билиминъизде кемшиликти коьрсетсенъиз, сол тек сизинъ ялгыз оьзинъиздинъ етиспевлигинъиз болып калмайды, сизге карап, ногайды танымаган аьдем, савлай миллет акында айтаяк», – деди Амир Шабанов. Ол йыйылган яслар ман сорав-явап шарасын да озгарды. Айырымланган окувшы савга да алды.
Ногай районы бойынша Россия ОМВД-сынынъ ПДН куьбининъ тамада куллыкшысы К.Мусаев мырады бар окувшылар савлай Россия МВД окув учреждениелерине окымага бармага ыхтыяр алмага болатаганлары акында билдирди. Оннан сонъ аьлиги заманда бек маьнели маьселелердинъ бириси – ишкишилик эм наркотикли алатлар акында хабарлады.
«Бизим яслар мектебти кутарганнан сонъ, кырга окымага кетедилер, оларга биринши-экинши курсларда бек кыйын болады, араларында яман йолга туьсип, кыянатлык эткенлер де расадылар, солар акында билдируьвлер бизим боьликке туьседи, элбетте, биз олардынъ атларын СМИ тармакларында данъклатпаймыз. Сондай аьллер бизди кайгыртады.
Сиз тезден мектебтинъ эсигиннен абытынъызды алаяксынъыз, сак болынъыз, тек ийги атынъызды шыгармага шалысынъыз», – деген маслагатларын К.Мусаев берип кетти.
Шарадынъ экинши кезеги – балаларды савытлар ман таныстырув эди. Мунда полиция куллыкшылары, балалар алдына салынган савытлардынъ аьр бирисин алып, сонынъ акында анълатув этип, хабарладылар. Йыйылган балалар уьйкен кызыксынув ман савытлар акында хабарларды тынъладылар. Кинологлар службасынынъ куллыкшысы Р.Таушев те оьзлерининъ ийтлери акында, олардынъ уьстинликлери акында хабарлады эм ийтлерининъ оьнерин коьрсетти. Бу куьн балалар алдында ийт усташа савытларды тавып болув оьнерин коьрсетти.
Шарадынъ озувында Ногай районы бойынша ОМВД куллыкшылары келген балаларга аьскерлик асынынъ даьмин де татпага бердилер.
Буьгуьнги шара А-Х.Джанибеков атындагы мектебинде дослык волейбол турнири озувы ман тамамланды. Катнаскан командалар Ногай районы бойынша ОМВД-сынынъ савгасы ман белгиленди.
Г.Сагиндикова.
Суьвретте: шара озган мезгилинде.
