Данък сага, Ленинград

900 куьн эм кеше ленинградшылар эм оны коршалаган совет аьскершилер калады явга бермеске баьри куьшин салганлар. Ашлык та, аяз да, токтавсыз йогардан калага туьскен топлар да онынъ яшавшыларын яв алдында тизге шоьктирип болмадылар. Канын-янын аямай Ленинград уьшин куьрескен совет аьскершилер сырасында бизим ердеслеримиз де болган, айтпага: Муса Отаров, Зармуханбет Биймурзаев, Танъатар Мурзагишиев, Алексей Харьков эм баскалар.

Ленинградтынъ блокададан босатылувына 75 йыл толганына багысланып, янъыларда Ногай район уьлке танув музейинде «Блокададынъ ябылмаган яралары» деп аталган йигитлик-дериси озгарылды. Шарады музей етекшиси К.Бальгишиев пен район орталык китапхана куллыкшылары А.Якубова эм Б.Бегалиева уйгынладылар, мунда Кадрия атындагы школадынъ етекшисининъ тербиялав иси бойынша орынбасары Зульфия Отарова эм 11-нши класс окувшылары катнастылар. Солай ок шарада баьтир-калады коршалавда катнаскан ердеслеримиз Муса Отаров эм Зармуханбет Биймурзаевтинъ (яткан ерлери еннетли болсын) кызлары Зухра Байманбетова эм Оьлмес Отарова конакта болдылар.

Элимиздинъ тарихи кайдай авыр болса да, биз оны билмеге борышлымыз. Буьгуьн мунда окувшылар аьли де бир кере Ленинград блокадасынынъ авыр оьзгерислери акында шара юритуьвшилер Арина Якубова эм окувшы Дженнет Эспергеновадынъ айткан хабарларыннан эситтилер: яшавшылардынъ туьскен кыйын аьллери, баладынъ колы ман язылган, савдуныяга баска ленинградшылар ман бирге коьрген Савичевлердинъ аьелининъ казасын билдирген 9 бетли дневник, баьтирлик эм патриотлык…

Ленинградта Уллы Аталык согысы йылларында болган оьзгерислер акында коьзяссыз хабарламага да, тынъламага да кыйын. Коьзясларды шакырган сыдыралы ятлавларды Айза Бегалиева, Юлдуз Нурлубаева, Алтынбике Исламова окыдылар.

Сонъ соьз конакларга берилди. Аталарынынъ согыс йолы, алган савгалары акында Зухра Зармуханбетовна ман Оьлмес Мусаевна кызыклы эм оьктемсип хабарладылар. Оь.Отарова атасынынъ согыста коьрсеткен йигитликлери уьшин берилген савгаларын аькелип, балаларга коьрсетти. Окувшыларга ой-маслагатларын музей етекшиси Каирбек Бальгишиев те айтты.

Эстеликли куьнге багысланган шара кызыклы оьтти. 

Н.Кожаева.
Суьвретте: йигитлик дерисиннен коьринис.