Янъыларда «Шоьлде тазалыкты саклав –  онынъ яшавшыларынынъ бас борышы» деген шакырув астында Куьнбатар авыл яшавшылары авыл тоьгерегин, шоьл бойын кокыслардан тазаладылар. Бу пайдалы, онъайлы исти уйгынлап озгарув авыл яшавшыларынынъ, боьтен де яслардынъ ойы эди. Олардынъ бас мырады шоьлди кокыслардан тазалав, савландырув эм сол ийги ойды Ногай районынынъ яшавшылары арасында яйылдырув болады. 

Сол куьн Куьнбатар авылынынъ ясуьйкенлери, яслары автокоьлик ярдамы ман, оьзлери авыл тоьгерегин, шоьл бойын тасланган кокыслардан тазаладылар. Куьнбатаршылар сол баслаган онъайлы исти Бораншы авылына эстафета эсабында коьширдилер. 

Коьп кетпей, сол ийги ойды Терекли-Мектеб авылынынъ яшавшылары да якладылар. Авыл яшавшылар ман шоьл бойында яткан кокыслар йыйылды, коьлик ярдамы ман тасланды.   

Ювык арада сол эстафета районымыздынъ баска авылларына да коьшип, ясларымыздынъ ойлаган таза ниети яшавга айланып бараягына соьз йок. Шоьлимиз онынъ бойында кайбиревлер мен кирленген кокыслардан савланып, таза, коьркли болып, енъил тыныс алаягы онынъ яшавшыларынынъ колында. Шоьлимизде, ата юртымызда тазалыкты саклавда баьримиз де бирлесейик.

Г.Нурдинова.
Суьвретте: шоьлди тазалав куллыклары юруьв аьсери.