Бир ис орында аьдем 6 ай узагында аьрекетин бардырган болса, ол биринши йылынынъ тыншаюв куьнлерин алмага болады, тек ис беруьвши мен соьйлесуьвге коьре, оннан да эртерек алмага ыхтыяры бар, экинши эм сонъгы йылларда ол тыншаюв куьнлерин тийисли йорыкка коьре алмага болады. 

Йыл сайын, календарьли йыл басланаяктан 2 юма алдын ис беруьвши исшилердинъ тыншаюв куьнлерининъ графигин токтастырмага керек болады. Солай ок, тыншаюв куьнлери келгенше эки юма калганда, ол аьдемге сол куьнлердинъ ювыклаганын билдирмеге эм кол да бастырмага керек. Эгер ислейтаган аьдемлердинъ сакат балалары, 12 ясларына толмаган 3 баласы бар болса, шаркы авыр кыскаяклылар, ясы етпегенлер ис беруьвши мен токтастырылган графикке келиспей де тыншаюв куьнлерин алмага боладылар.

Соьйлесуьвге коьре тыншаюв куьнлер бир неше кесекке де боьлинмеге болады, тек сол кесектинъ биревси 14 куьннен кем болмага ярамайды. Аьр йыл сайынлык тыншаюв куьнлердинъ 28 куьннен (тийислиси) артыгын ис аьрекетши оьз аьризесине коьре алмай, акшасын алмага да болады. Тек сол куьпке шаркы авыр хатынлар, ясы етпегенлер эм ис аьрекетин авыр аьллерде бардыратаганлар кирмейдилер.

А.Дильманбетов,
Ногай район прокурорынынъ орынбасары юстициядынъ киши маслагатшысы.