Элге куллык этеди

Бу шара бек кызыклы болып озды. Заурбек оьз иси акында хабарлады. Балаларга онынъ бактысы айырым маьнели эди. Заурбек Ганиев Куьнбатар авылында 1992-нши йыл тувган. 1999-ншы йыл авыл мектебинде баслангыш классына окувга барган. Ол оьзининъ биринши окытувшысы Дина Якубовна Казманбетовады ак юректен разылык соьзи мен эскереди. Мектебти 2010-ншы йылда етимисли битиреди. Класс етекшиси Сабират Абдурахман кызы Межитовадынъ Заурбекти билимли, нызамлы этип тербиялавда коьп кыйыны бар.

Бала шагыннан алып юрегинде уьмит эткен мырадына етер уьшин Пермь каладагы Россия МВД институтына сол йыл ок та окувга туьседи. Аьлиги заманда бу окув ошагы Россия миллет гвардиясынынъ йогары аьскершилик институты деп аталады. Соны З.Ганиев 2015-нши йылда уьйкен уьстинликлери мен кутарган сонъ, Хабаровск крайындагы 6912-нши  оперативли борышты толтырувшы айырым батальонына куллык этпеге йибериледи. Сонда ол оьзининъ талаплыгы, ис суьерлиги, аьруьв нызамы, етекшилеп болувы ман оьз аьскер дережесин оьстиреди: лейтенанттан тамада лейтенантка, взвод командириннен батальон командирининъ орынбасарына дейим. 2017-нши йылдынъ казан айыннан бу куьнге дейим Магадан областиндеги Росгвардия управлениесинде автомобильлерди техникалык канагатлав туьркимининъ командири болып, капитан офицер дережесинде куллык этеди. 

Заурбек ясларга аьдем оьз мырадына етер уьшин эртерек, аьли бала шагыннан алып сога талап этпеге керек дейди. Ол эки соьзининъ бирисинде балаларга окынъыз, заманында билим алып калынъыз, тербиялы болынъыз, спорт пан аьвлигинъиз деген туьз маслагатларын берди. Окувшылар ога соравлар бердилер эм соларга толы яваплар алдылар. 

Йолыгыста З.Ганиевтинъ акында йылы мактав соьзлерин онынъ алдынгы окытувшылары Вагидат Янполова, Сабират Байрашева, Мурзадин Якубович эм класс етекшиси Сабират Межитова айттылар. «Заурбек-кедемиз бек талаплы, кыйынсуьер, айткан соьзинде табылатаган, баьри мен де ортак тил тавып билетаган аьдемлерден. Мектебте ол меним онъ колым эди, – деди класс етекшиси. – Ол баьри шараларда да катнаскан. Онда «мен билмеймен» деген аьдет йок. Ога эндиги де коьп уьстинликлер йорайман!». 

Ызгы йылларда авыл мектебимиз, сав авылымыз яс ердеслеримиз, Санкт-Петербургтагы Согыс-Тенъиз академиясынынъ окытувшысы, майор Арифулла Саитов пан, гвардия лейтенанты Ибрагим Бариев пен, Ростов областиндеги ФСБ куллыкшысы Р.Оразлиев пен, аьлиги заманда йогары аьскер училищелеринде окыйтаган курсантлар Расим Суюндиков эм Артур Саянов пан оьктемсийдилер. 

Эндигиден армаган мектебимизде мунавдай эстеликли йолыгыслар тагы да болар деп сенмеге суьемен, неге десе авылымызда окувлары, ислери мен сый казанатаган ясларымыз аз тувыл.

С.Межитов,
Куьнбатар авылы, запастагы капитан. 
Суьвретте: Заурбек Ганиев.