Янымнынъ авырувы – Афганистан

«Афганистан меним янымнынъ авырувы» деп аталып, 10-ншы «а» класста шара озгарылды. Шарады юритуьвшилер А.Динисламова эм К.Курганова Афганистан темасы бизим дайымлык авырув, бизим ашшы яра деген ойды эситтирдилер. Бизим арамызда бар аьеллер, сол согыстынъ акында кырдан эситпей, сол йыллардынъ ашшысын татканлар. Шарага конак болып Афганистан согысынынъ ветераны Мурат Мамутов келди. Ол окувшыларга согыстынъ, баьтирше согыскан аьскершилер акында хабарлады.

13-нши февральде спорт ярысы озгарылды, мунда уьйкен класс окувшылары катнастылар. ОБЖ окытувшысы А.Койбаков шарады школадынъ ата-ана комитетининъ председатели А.Аккишиевке командалар ярыска аьзир экени акында рапорт беруьв мен ашты. Ярыс катнасувшылары эм конаклар алдында хошлав соьзи мен школа директоры К.Ярикбаева, тербиялав иси бойынша директордынъ орынбасары Э.Суюндикова шыгып соьйледилер. Командалар аркан тартув, атысув, противогаз кийуьв, эстафета бойынша ярыстылар. Тоьрешилер афган согысынынъ ветераны С.Култаев, А.Аккишиев болдылар. Биринши орынды  9-ншы «а» классынынъ окувшылары алдылар. Ийги деген окувшылар Сый грамоталар ман савгаландылар.

15-нши февральде уьйкен классларынынъ окувшылары районда Афганистаннан совет аьскерлери шыкканлы 30 йыл болганына багысланган шараларда катнастылар.

Бизим хабаршы.
Суьвретте: Афган согысынынъ ветераны М.Мамутов окувшылар ман.