Бир неше саьат ишинде йыйылыс куьплери  аьвелги сырт халкларынынъ аьдетлерин эм сондай баска соравларга яваплап, билгенин коьрсетип, билимлери, тапкырлыгы ман сынастылар. Бу туьрли миллетли эм туьрли ясындагы аьдемлерди бирлестирген кызыклы ойыны эди. Онда катнасувшылар заманын пайдалы озгардылар, аьр бир ойын юрген сыпырада билимлери мен кызувлы куьрес оьтти, катнасувшылар коьп кызыклы аьдемлер мен таныспага амал таптылар. 
ХМАО-Юграда «Биз россияшылар» Россия халкларынынъ яслар  ассамблеясы» деген ортакроссиялык ямагатлык козгалысынынъ регионаллык боьлигининъ агзасы Рифат Кутильгереев сол уьйкен, маьнели ярысты уйгынлавшыларынынъ бириси эди. 

Ногай ястынъ ойына демевлик этип, ярыста Ногай яслар союзынынъ агзалары да ортакшылык эттилер. Енъуьвшилерге медальлер, баьри катнасувшыларга да Сый грамоталары тапшырылды. Наиля Аджикеримова оьз куьби мен савлай катнасувшылардынъ арасында 1-нши орынды, Агали Койлакаев оьзи етекшилеген куьби мен 2-нши орынды бийледилер. Йыйылганлар ойын барысында ногай яс йырлавшыларымыз Узаир Найманов эм Эдиге Куруптурсуновтынъ оьнери мен де таныстылар.

Пайдалы ярыс йогары коьнъилде уйгынланып оьтип, аьр бир катнасувшыдынъ юрегинде дослык сезимлерин, баска халкына сыйды оьстирди. 

Г.Нурдинова.
Суьвретте: «ЭтноКвиз» ярысынынъ катнасувшылары.