Бу йолыгыска Сапихан Зартувовна бек аьруьв аьзирленген эди. «Орыс тилин бек ийги билуьвши» деп аталган китаплер выставкасы да коьзди кувантып, конак болып келген окувшылардынъ кызыксынувын да коьтерди. Шарадынъ барысында окувшылар уллы тилшилердинъ бириси Владимир Дальдинъ ис аьрекети мен, яшав йолы ман таныстылар. Онынъ бизге эткен савкаты – соьзлиги, онынъ бас ис аьрекети болмаган, ол куьннен-куьнге сав яшав оьмири бойынша орыс соьзлерди, соьз биригуьвлерди, такпаклар ман айтувларды йыйнап келген. Соьйтип эткен куллыгы бизим алдымызда – соьзлик. 

Соьзликтинъ авторы В.Даль акында кызыклы хабарды тынълаганнан сонъ аьр бир окувшыга сол соьзлик пен таныспага амал берилди. Олар болса, оьзлерине керекли соьзлердинъ маьнелерин карадылар, берилген борышларды толтырдылар. Баьриси де сол борышларды яваплык пан толтырдылар. 
Йолыгыс бек йылы хабарласув аьлинде оьтти. Балалар оьзлерине коьп пайдалы билдируьвлерди алып кайттылар.

Г.Курганова.
Суьвретте: йолыгыс шагы.