Йол-юрис йорыкларды тутув керек

Шарадынъ бас мырады – йолавшыды автокоьлик пен таптавдынъ эм йол-юрис йорыклардынъ тутылмавынынъ алдын шалув. Россия Федерациясынынъ КоАП коьре, йол-юрис йорыкларын бузган аьдемлер де административли яваплыкка тартыладылар.

Ол тийиссиз ерде йолды оьтсе, йолюрис йорыкларды бузса, РФ КоАП 12.29-ншы статьясынынъ 1-нши кесегине коьре, 500 маьнет штраф тоьлемеге керек болады. Эгер ол, йол-юрис йорыкларды да бузып, автокоьликлерди де саьспеклетсе, административли правойорыклар бузув Кодексининъ 12.30 статьясынынъ 1-нши кесегине коьре, 1000 маьнет акшалай штраф тоьлейди.

Эгер йол-юрис йорыклары бузылып, йолавшыдынъ куьнасине коьре аьдемнинъ ден савлыгына кишкей болса да йойым келтирилсе, ол 1500-2000 маьнет акшалай штраф тоьлемеге керек болады.

Солай ок эсинъизге саламыз, 2015- нши йылдынъ шилле айынынъ биринши куьниннен алып токтастырылган, кешки шакларда йолда юрген йолавшылардынъ уьстинде яркыраган бир заты болмага керек.

Сондай затлары йок йолавшы кеште йол-юрис йорыкларын бузувшы деп саналады. Кыс шакларда йолавшылар да, автокоьлик айдавшылар да йолда сак болмага керек болады, неге десе кар явса, йолда бир зат та коьринмейди, йолда бузлавык та болады.

Йолда юретаган аьдемлерге де, коьлик айдавшыларга да, сак болынъыз, йол-юрис йорыкларды тутынъыз деп айтамыз. Сизинъ кавыфсызлыгынъыз, коьбисинше, оьз колынъызда болады.

Д.Аджибаев,

Ногай районы бойынша Россия ОМВД-сынынъ полиция начальнигининъ исин юритуьвши полиция подполковниги.