Ол асылы ман Ногай районынынъ Карасу авылыннан болады. Ерли мектебте окувын тамамлап, ол Черкесск каласынынъ педагогикалык училищесинде билим алган. Кыскаяклы казах яс пан татым аьел курып, ян косагы ман Уренгой каласында суьйген иси мен каьрлеп келеди. Ол оьзининъ яшавын «Сиэль» парфюмерия эм косметика компаниясы ман байлап келеди.

Ол буьгуьнлерде «Сиэль» деген парфюмерия эм косметика компаниясынынъ регионаллык складынынъ етекшиси болып аьрекет этеди. Онынъ айтувы ман, оьз иси мен ол аьдемлерге ярасыклык эм етимис савкатлап келеди.

Ол компаниядынъ аьрекети бойынша туьрли эллеринде болган. Сол исинде йогары коьнъил мен аьрекетлеп келеди.

Баска болып, Алтынбийке Ямало-Ненецкий автономиялык округы бойынша аьрекет этетаган «Ногай Эл» деген регионаллык миллет-маданият автономиясынынъ уйгынлав комитетининъ агзасы да болады. Онынъ эм йолдасларынынъ ярдамласувлары ман Янъы Уренгой каласында туьрли амалламалар озгарылып барады.

Айтпага, тек янъыларда олардынъ яныплы иси аркалы, февраль айынынъ сонъында халкымыздынъ йырлавшылары Джамбулат Караев эм Зухра Булгарова ман йолыгыс кешлиги уйгынланып оьтти. Сол йолыгыс кешлиги ногайларды бирлестирип, йогары коьнъилде оьтти. Келеекте олар кала куьнине рас келип, «Сабантой» амалламасын да уйгынламага мыратланадылар.

Хаирбек Алакаевтинъ етекшилиги мен ногайлар уьшин сол ярдамлык аьрекетин Альберт Тамакаев, Альберт Найманов, Фатима Тамакаева, Зуля Османова, Алтынай Алиева, Эльвира Исаева эм сондай баскалар толтырып келедилер. Олардынъ аьр кайсысы онда яшайтаган ногайларына кайсы ягыннан да ярдамын тийгистип, олардынъ яшавын кызыклы этпеге шалысадылар.

Алтынбийке, тек предпринимательлик иси мен каьрлеп калмай, наьсипли ана да болады. Онынъ увылы Рулан буьгуьнлерде Россия баьтири В.Шарпатов атындагы кадетлик школасында билим алады. Оьзининъ уьстинликлери мен анасынынъ куьезин оьстирип келеди. Алтынбийкеди келеятырган 8-нши Март хатын-кызлар байрамы ман кутлап, суьйген исинде йогары етимислер йораймыз.

Г.Рамазанова.

Суьвретте: А.Китапбаева.