Мектебте окыйтаган йылларында Зульфия Нургишиева окымыслы, тынълавлы, тенълери мен ойнап-куьлип юретаган кыз эди. Биринши окытувшысы Зулиха Янибек кызы Межитова, сонъында класс етекшиси Лиза Махмуд кызы Джелкашиева болган, олардынъ акында Зульфия Магометали кызы йылувлык пан эскереди, суьйикли окытувшылары Э.Изеев, В.Янполова, Р.Муллаева, Ю.Кошекбаева, А.Межитов акында хабарлайды.
Отыз йылдынъ артында школады битирип, яс кыз Махачкала каласындагы Дагестан патшалык окытувшылык институтынынъ биология эм химия факультетине туьседи эм 1994-нши йыл уьстинликли битиреди. Сол йыл ок яс специалист Ногай районынынъ Уьйсалган авылына ислемеге келеди. Эм буьгуьнге дейим оьз куллыгын сол мектебте бардырады. Солардынъ ишинде 13 йыл завуч болып ислеген. 2013-нши йылдан алып Уьйсалган мектебининъ директоры болып ислейди.
Коьплеген окувшыларга тек билимин тувыл, юрегининъ йылувлыгын, янынынъ саьвлелерин савкат этип берип келеяткан окытувшылардынъ бириси Зульфия Магометали кызы. Онынъ окувшылары биология дерислерин кызыклы деп санайдылар, ийги этип биледилер. Коьплеген район, республикалык, россия конкурсларда катнасып, белгили болганлар. Соьйтип, Альфира Бекмуратова, Алина Кошекбаева туьрли йылларда Савлайроссиялык конкурсларда катнасып, оьз ислерин Ярославль эм Москва калаларында коршалаганлар. Районда озгарылатаган олимпиадаларда да аьр дайым катнасадылар онынъ окувшылары, озган йыл Эмиля Кожаева Махачкала каласында биология бойынша олимпиадада катнасып, ийги коьрсетим берди.
– Меним куллыгым – меним байлыгым. Аьр бир окувшыды мен юрегимде саклайман, олардынъ уьстинликлери меним юрегимде оьктемлик сезимлерин тувдырадылар. Оькинишке, тезтез коьриспеге амал болмайды, болса да олар ман байланысты уьзбеске шалысаман. Меним окувшым Сулейманова Айшат буьгуьнлерде Курской районынынъ Рощино авылында мектеб директоры болып ислейди. Мектебте балалар аз, ама амал тавып, байрамлар, туьрли шаралар озгарамыз.
Быйыл мектебке 60 йыл болады, сол мерекеди белгилемеге ниетим бар, тек коьп куллыклар этпеге керек, — деп хабарлайды куллыгы акында окытувшы. Директор куллыгын да бажарымлы юритеди Зульфия Магометали кызы, онынъ акында «яс болса да бас» деп айтадылар авылда. Уьйсалган авылын тувган авылым деп санайды ол. Мунда ян косагы Ариф пен уьйкен уьй курдылар, балаларды оьстирдилер. Берекети мол, капылары конакларга аьр дайым ашык Кожаевлер уьйинде.
Язлык байрамы ман кутлап, бактысы наьсипке толсын деп, ден савлык эм уьстинлик сагынамыз кыскаяклыга. Алдыда аьли де коьп яхшылыклар болсын.
Г.Бекмуратова.
Суьвретте: З.Кожаева.
