Сыйлы атка тийисли болган кыскаяклыларымызды Зульфия Аджигеримова ман Мухминат Отевалиевады хатын-кызлар байрамыннан алдын Дослык уьйинде озган шатлыклы шарада Дагестан Республикасынынъ Аькимбасы Владимир Васильев кутлап, белгилерин тапшырды. Муслим Шаникеев болса, оьз белгисин ДР маданият министри Зарема Бутаевадынъ колыннан алды.

Муслим Алиевич пен Зульфия Маматалиевна халкымыздынъ маданиятынынъ оьрленуьвине оьз уьлислерин косып келедилер. Олар районымызда эм онынъ тысында озган концертлерде, фестивальлерде катнасып, билбил тавыслары ман тынълавшылардынъ коьнъиллерин коьтередилер.

Янъыларда З.Аджигеримова Казахстанда озган ногай маданиятынынъ фестивалинде де катнаскан, «Тоьгилсин халк йыры» фестивалинде йыл сайын ортакшылык этеди.

Мухминат Нурадиловна оьзининъ ярасык суьвретлери мен ногайды сукландырады. Онынъ суьвретлеринде халкына суьйими аян коьринеди. Зейинли суьвретши «Яшав – ол йыр тувыл» поэтикалык йыйынтыгынынъ авторы. Онынъ бир неше суьвретлер выставкасы уйгынланган, айтпага, Черкесск каласында «Маьметекей» журналынынъ мерекесине багысланган шарада эм баска ерлерде.

Ак юректен биз сыйлы атка тийисли болган маданият куллыкшыларымызды кутлап, оьз ислеринде оннан да йогары бийикликлерге етискенлерин, йолларына нур себилгенди йораймыз.

Н.Кожаева.

Суьвретте: М.Шаникеев, З.Аджигеримова эм М.Отевалиева.