Бальбек Аджибайрам увылы яс заманнан алып оьз халкынынъ тарихи мен кызыксынатаган эди, уьлке танув музейине экспонатлар йыйнайтаган эди, сонъында ол СССР илмилер Академиясынынъ Географиялык Ямагатынынъ ногай боьлигинде музей ашады эм оны басшылайды. Сонъында бу музей республикалык патшалык уьлке танув музейининъ филиалы болады.

Буьгуьнлерде сондай сыйлы ердесимиздинъ аты ерде калмаганына баьримиз де оьктемсиймиз, уьлке танув музей онынъ аты ман аталган. Музей меканында Бальбек Кельдасовтынъ аты ман мемориаллык тактасы ашылды.

Шарады «село Терекли-Мектеб» авыл администрациясынынъ басы З.Аджибайрамов ашты эм юритти. Ол хошлав соьзинде белгили ердесимиз халкымыздынъ тарихинде кайдай маьнели ыз калдырганын белгиледи.

Солай ок «Ногайский район» МР администрациясынынъ аькимбасынынъ орынбасары Х.Саитов, «Ногайский район» МР Депутатлар йыйынынынъ председатели Р.Насыров, Бальбек Аджибайрам увылы ман бирге ислеген, онынъ окувшылары – уьлке танув музейининъ директоры К.Бальгишиев, ногай композиторы Я.Кудайбердиев, Россия Федерациясынынъ ат казанган маданият куллыкшысы Н.Муталлапова, Б.Кельдасовтынъ увылы Руслан Кельдасов, Кизляр районы бойынша миллет-маданият автономиясынынъ председатели И. Бийгишиев шыгып соьйледилер.

Олардынъ кайбириси Бальбек Аджибайрам увылы оьз яшавын халкына багыслап яшаганы, онынъ аркасы ман бизим яслар ногай халкынынъ тарихин билгени акында ашык кепте айттылар.

Мемориаллык тактады ашпага сый «Ногайский район» МР Депутатлар йыйынынынъ председатели Р.Насыровка эм ясуьйкенимиздинъ увылы Руслан Кельдасовка тийисли этилинди. Ногайда «Сый иесин табады» деген соьз бар. Сол соьзлер сол этилинген ийги иске бек келисли деп ойлайман.

Г.Бекмуратова.

Суьвретте: уьлке танув музейинде Б.Кельдасовтынъ эсине мемориаллык тактасы.