Балалар уьшин яшаймыз, олар яшав йолында суьринмесин, абырайлы, сыйлы болсын деп куьш саламыз. Соьйтип яшайдылар Темирхан эм Менълихан Аюповлар. Коьплеген йыллар таныйман мен оларды, эм буьгуьнлерде олардынъ аьвлетлерине куьезленип турганларын коьргенде, суьйинишке толады юрегим, неге десе аьр бир ата-анага баладынъ етимислери кайдай уьйкен куьез. Эки кыз, ялгыз кеде оьстирдилер олар, буьгуьнлерде уьйкен кызы да, увылы да оьзлери аьел курып, оьз яшавы ман яшайдылар. Кишкей кызы Эльзара 11-нши классынынъ окувшысы. Аюповлардынъ аьели узактагы Сургут каласында ерлескенлер, тувган Орта-Тоьбе авылыннан алыста болсалар да, шоьлдинъ тынысын, ювсан ийисин янларында саклайдылар.Адильхан Темирхан увылы Аюпов Сургут каласынынъ окружной больницасында врач-хирург болып ислейди. Яс врачты ис йолдаслары да, авырувлылар да ийги хирург деп белгилейдилер. Бала заманнан алып Адильхан врачлардынъ куллыгы ман кызыксынатаган эди, белки, сол заманларда онынъ сол кеспиди сайламага ойы токтаскандыр, белки, сол заманнан алып ол оьзинде ийги врачка тийисли касиетлерди тербиялап баслагандыр. Аьлиги заманда Адильхан мектебте, медакадемияда окыган йылларында ога билим берген, кеспи сулыбына уьйреткен, маслагат эткен аьдемлерге оьз разылыгын билдиреди. Орта-Тоьбе авыл мектебин битирип, 2009-ншы йыл Адильхан Саратов каласынынъ патшалык медициналык университетине туьседи, уьстинликли битиреди. Сонъында Сургут каласында интернатурасын, ординатурасын битиреди. Баьриси де ийги врач болып болмайды деп ойлайман мен, сол акыйкатлыкты яшав неше кере де ыспатлап келеятыр. Ийги врач айырым касиетлер иеси болмага керек,  ол сезгир, шыдамлы, танъ болмага кашан да керек, ама сол касиетлер мен бирге онда катылык, йигерлик, керекли заманда карар алып болувлык, яваплылык та болмага тийисли. Ийги врач оьз исине савлай юреги мен алал, оьзининъ кесписининъ маьнели экенин анълайды, кыйынлыктан коркпайды эм оьз яшавын аьдемлерге багыслап яшамага разы. Мен билемен, бу касиетлердинъ бир нешевлери Адильханда бар, йок болганлары ога ис сулыбы ман, йыллар ман келер деп сенемен. – Мен энъ де баслап врач. Врачтынъ бас борышы – аьдемлердинъ авырувын аянлап, оларды эмлев. Сол затка биз Гиппократка ант эткенмиз, сол затка биз авырувлылардынъ алдында, боьтен де оьзимиздинъ алдымызда яваплы, – деп хабарлайды Адильхан кесписи акында соравга явап бергенде. Туьрли аьдемлер, туьрли авырувлар. Заманында керекли ярдам этпеге, ийги соьз бен аьр бир аьдемнинъ коьнъилин авламага шалысады яс врач. Больница етекшилери Адильханнынъ исине яваплылыгын коьредилер, оны коьтергишлейдилер, болса да яс специалист бир куьн де басын коьтермейди, онынъ айтувына коьре, энъ де баалы коьтергишлев, энъ де баалы савга – авырувлылардынъ ден савлыгы, олардынъ разылык соьзлери, неге десе аьдемнинъ энъ де уллы байлыгы – ден савлыгы. Адильхан бизим коьзимиздинъ алдында оьскен бала, мен анасы Менълихан ман бир класста окыдык, сога коьре болар онынъ сондай ийги кесписин сайлап, сол тармакта уьстинликли болып ислеп турганы мага да суьйинишли. Адильханнынъ аьлейи Диана да врач, яс аьелде кишкей Эльдина оьседи, боьтен де ол атай ман тетейге куваныш аькелип, уьйди завыклы бала куьлкисине толтырады. Алдыда аьли де коьплеген йыллар. Ис сулыбы да, яшав сулыбы да Адильханнынъ яшавына келер. Ийгиликлер, уьстинликлер йорап, яс ердесимизге куллыгында бийикликлер, яшавында суьйинишлер сагынамыз.

Г.Бекмуратова.

Суьвретте: А.Аюпов (онъда) ис йолдасы ман.