Маьнели соравлар каралды

Солардынъ ишинде – «Терроризм эм экстремизмге карсы турувда ыхтыяр саклав органларынынъ, Билимлендируьв управлениесининъ, яслар организацияларынынъ биргелес ислеви», «Авылда бав-бахша шашув ерлерге сатып сув беруьв акында договорлар туьзуьв ислерин юритуьв». Биринши сорав бойынша оьз доклады ман Ногай районы бойынша Россия иш ислер боьлигининъ етекшиси А.Койлубаев, Билимлендируьв управлениесининъ етекшиси К.Отегенова, «Яслык» яслар организациясынынъ директоры А.Акбердиев шыгып соьйледилер. Олардынъ кайбириси терроризмге карсы турув ислери акында хабарладылар, алдыда этилинеек куллыклары акында айттылар, белсен куллыкты яслар арасында юритпеге керегин билдирдилер. Бу сорав бойынша оьз ойларын ямагат кавыфсызлыгы бойынша «Ногайский район» МР администрациясынынъ аькимбасынынъ орынбасары Б.Ярлыкапов айтты. Экинши сорав бойынша УОС етекшиси С-А.Сарсеев шыгып соьйледи. Онынъ айтувына коьре, сувды еткеруьв бойынша маьселелер аз тувыл. 2018-нши йылдынъ ишинде Орта-Тоьбе, Карагас авыл администрациялар баслары договорлар бойынша акша тоьлемегенлер. Быйыл договорлар авыл администрациялар ман эм айырым арендаторлар ман туьзилген. Авыл аькимбаслары арендаторлар ман анълатув хабарласувлар юритпеге кереклиги акында айтылды. Эки сорав бойынша карарлар алынды. Солай ок этилген иси акында доклады ман Ногай район БТИ етекшиси Н.Аджиманбетова шыгып соьйледи. Ол 2018-нши йылда боьлик куллыкшылары район авыллары ман юрип, турак уьйлерди эсапка алганы, инвентаризация ислерин юриткени акында айтты. Соьйлегенлер йыйылганлардынъ соравларына явап бердилер.