Мыратлары яшавга айлансын

Сол борышты яшавга шыгарув мырат пан Савлайроссиялык, республика, район, мектеблер бойынша шаралар озгарылып, туьрли талапларды оьрлендируьв проектлери, саниятлар мектеблери аьрекет этип келедилер. Оьнерли саьбийлеримиздинъ бириси болады Кумлы авылынынъ яс яшавшысы Алина Эдильбай кызы Нурлубаева. Алина Шихмурзаев атындагы орта мектебининъ 4-нши класс окувшысы болады. Ол 2009-ншы йылдынъ коькек айынынъ биринши куьнинде Ямало-Ненецкий автономлык округынынъ Янъы Уренгой каласында Эдильбай эм Эммадынъ аьелинде тувган. Кыз кишкей заманында онынъ аьели сырт бетлерден тувган ерине кайттылар. Анасы Эммадынъ белгилевине коьре, Алинага йырлав оьнери энесиннен келген. Онынъ оьнери ол Кумлы авыл балалар бавына барганда аянланып басланды. Тербиялавшы Зоя Елманбетовадынъ, анъ дерисиннен окытувшы Кабират Бегалиевадынъ етекшилиги мен кызалак туьрли шараларда ортакшылык этип баслады. Ол кыздынъ оьнершилик йолында биринши абытлары болдылар. Шараларда катнасып оьнерин оьстируьви онынъ окувына бир буршавлыгын да этпейди. Буьгуьнлерде ол 4-нши классынынъ окувшысы. Мектебте окытувшы Марина Адильгереевадынъ етекшилиги мен Алина ийги белгилерге окып, нызамлы окувшылардынъ бириси болады. Ол мектеб, авыл бойынша озгарылатаган шаралардынъ белсенли катнасувшысы. Алинадынъ конъырав сесинде туьрли йырларын тынълавшылар суьйип тынълайдылар. Онынъ оьнерин оьстируьв мырат пан ата-анасы кызды Терекли-Мектебте Сраждин Батыров атындагы саниятлар мектебине яздылар. Онда, ол окытувшы Боранбийке Коккезовадынъ етекшилиги мен, 2018-нши йылда вокал классына юмада эки кайта юрип баслайды. Домбыра, пианино алатларында усташа ойнамага, кеспили йырламага уьйренеди. Ол «Шоьл тавыслары», «Дагестан – ошагым меним» район ярысларында биринши орынга тийисли этилген. 2019-ншы йылдынъ навруз айында Алина Нальчик каласында оьткен «Наьсип налы» деген VI Халклар ара ярысында «Эстрадное пение» деген номинациясында ортакшылык этип биринши орынга эм алтын медалине тийисли болды. Ол 9 ясында болса да, коьплеген Сый грамоталардынъ, дипломлардынъ иеси болады. Кишкей кыздынъ келеекте йыр оьнерин оьстирмеге деген уьйкен мыратлары бар. Аьли де Алинадынъ алдында юрмеген йоллар, сынавлар бек коьп. Сол сынавларды яс кызалак тийисли оьтеегине, мыратлары яшавга айланып, халкымыздынъ белгили йырлавшысы болаягына сенимимизди йоймаймыз.

Г.Нурдинова.

Суьвретте: Алина Нурлубаева.