Янъыларда Ногай районынынъ Куьнбатар авыл яшавшысы Балбике Джумалиевадынъ уьйине язлык куьннинъ ярык саьвлелери мен бирге куванышлы хабар да келди. Ол хабар не десенъиз, онынъ увылы Кантемир буьгуьнлерде оьзининъ эр борышын толтырып турган аьскер боьлигиннен келген Разылык хат экен. Оьз баласынынъ уьстинликлери уьшин кайсы ата-ана суьйинмейди? Балбике хатты оьзининъ авылдасларына, кардаш-тувганларына коьрсетип, ана юреги уьйкен куьезге толган.

Сол Разылык хатта булай деп язылган:

«Оьрметли Балбике Ниязовна!
Сизинъ увылынъыз рядовой Джумалиев Кантемир Янтемирович оьзининъ аьскершилик борышын намыслы толтыратаганы акында Сизге билдиремен. Ол оьзининъ йолдасларына аьскершилик нызамды тутувда коьрим болады, аьскерши кесписин алып, Аталыгымыздынъ сенимли коршалавшысы болган.
Сизге увылынъызды тербиялаганынъыз уьшин разылык билдиремен! 
6796 аьскершилик боьлигининъ командирининъ куллыгын кесек заманга юритуьвши подполковник А.А.Елисеев 27 март 2019 йыл». 

Яс авылдасымыз Кантемир Джумалиев аьлиги заманда Москвадагы «Пересвет» деген айырым тапшырмасы болган спецназ 33-нши отрядында оьзининъ эли алдында конституциялык борышын толтырады. 

Коьримли аьскершидинъ уьстинлиги мен онынъ анасы, кардаш-ювыклары эм баьри авылдаслары оьктемсийдилер. «Эр йигит эли уьшин тувады» деп атайлар билмей айтпаганлар.

М.Юнусов.
Суьвретте: К.Джумалиев.