Олимпиада уьш кезекте оьтти: баслапкы эки кезек – туьрли куллыклар яздылар, уьшинши кезегинде балалар адабиат бойынша соьйленисли явап бердилер. Аьр кайсысында да Замир терен билимин коьрсетти. 

Замир мектеб етекшисининъ орынбасары Хадижат Казгереевна Аракчиева республикамызда аьрекет этетаган, яз тыншаюв куьнлерде окувшыларды ОГЭ, ЕГЭ-ге аьзирлейтаган «Сириус» билимлендируьв орталыгына билимин арттырмага бармага маслагатын берген эди. Ол сонда барып, оьзининъ билимге аваслыгын коьрсетип, биз йогарыда келтирген лицейге шакырув алган эди. Замирде билимге ярык йолды А-Х.Джанибеков атындагы мектебининъ окытувшылары ашкан. Ол бала заманларыннан алып район, республика кезегинде озгарылган адабиат бойынша шараларда катнасып, терен билимин коьрсетип, енъуьвши болатаган эди.

Замир Мурзаев «Живая классика-2014,2019» Савлайроссиялык шарасынынъ да енъуьвшиси де болады. 

Оьктемсиймиз Замирдей окувшыларымыз бан, ердеслеримиз бен. Алдыда ога йогары уьстинликлер, билим тавынынъ энъ де йогарына еткенин йораймыз.

Г.Сагиндикова.
Суьвретте: З.Мурзаев.