Йолыгысты Дагестан Республикасынынъ Аькимбасындагы Ясуьйкенлер советининъ председатели Абдулла Магомедов ашты эм юритти. Оннан сонъ оьз доклады ман Ногай районымыз бойынша бар маьселелерди келтирип, муниципалитетимизде туватаган кыйынлыклар акында «Ногайский район» МР администрациясынынъ аькимбасы Мухтарбий Аджеков шыгып соьйледи. 

«Ногайский район» МР администрациясынынъ аькимбасы айырым эсти тийиссиз ерлерге курылыслар этилетаганы, мынълаган яслар йыл сайын кырга кететаганлары, йоллардынъ кулланувга яравсыз аьллери эм мелиорациялык куллыклар осал аьлде юритилетаганлары акында соравларга берди. 

Солай ок район етекшиси ызгы заманларда социал-экономикалык аьллер ийгиленуьвге баратаганы акында да билдирди. Онынъ соьзине коьре, районымызда социаллык, экономикалык, политикалык, ыхтыярлык, маданиятлык оьрлендируьвди ийгилендируьв уьшин, муниципалитетимизде тийисли аьллер туьзилгенлер. 

– «Развитие АПК» приоритетли проект ишинде районымызда авыл хозяйство продукциясын асыллав бойынша производстволар туьзилгенлер. Оьткен йылдынъ ишинде районымыз Иран, Турция эллерине эт продукциясын йиберген. Соны ман кой эт йиберилуьв аркалы келим 150 миллион акшалай болган», – деди М.Аджеков.
Ногай районымыз бойынша республикалык властининъ коьмек этуьви мен капиталлык курылыс тармагында аьллер ийгиленген, яшавшылардынъ яшав аьллерининъ сапаты да яман тувыл, медициналык ярдам бойынша да ийги коьрсетимлер бар. Болса да, шешилмеге керек соравлар да бар, маьселелер де аз тувыл. 

«Ногайский район» МР администрациясынынъ аькимбасынынъ докладыннан сонъ, йыйын катнасувшылары оьз ойлары ман боьлистилер, маслагатларын да бердилер. 

Армаганда Дагестан Республикасынынъ Аькимбасындагы Ясуьйкенлер советининъ председатели Дагестан Оькиметине, министерстволарына эм ведомстволарына, Ногай район администрациясына Ногай район еринде социал-экономикалык аьллерди ийгилендируьв уьшин этилмеге керек борышлар салынганлар. 

Суьвретте: йолыгыс шагы.