Баьримизге де белгили болганлай, алдымызда – янъы окув йылы. Сога аьзирлик коьрмеге керек болады. Балалар уьйкен суьйиниш пен янъы кийимлерди кийип карайдылар, мектебке керек затларды оларга ата-аналары сатып аладылар.
Колайсыз яшайтаган аьеллерге янъы окув йылына аьзирлик коьруьв кыйынлыклар тувдырадылар. Элимиз оларга да уьйкен эс этеди.
Аьдетке коьре, аьр окув йылы басланаякта, республикамыз бойынша «Балаларды окув йылга аьзирлейик» деген акциясын озгарылады. Бу акция сары тамбыз айынынъ басыннан ызына дейим озгарылады. Акциядынъ бас ниети– колайсыз яшайтаган аьеллердинъ балаларын мектебке аьзирлев.
Баьримизге де белгили мектебке тептерлерсиз, калемсиз барув дурыс болмайтаганы. Балаларда туьрли туьсли карандашлары, альбомлары болмаса, кайтип суьврет ясасынлар.
Ногай район орталыгынынъ япсарларында аьрекет бардыратаган тармаклардынъ коьбиси йогарыда белгиленген акцияда ортакшылык этип, саьбийлерди суьйиндиредилер. Бирге балаларга кырк кийик айдынъ биринши куьнин байрамга айландырадылар деп айтпага да болады.
Бу йылгы, аьдетке кирген акцияда Ногай орталык китапхана куллыкшылары да ортакшылык эттилер.
Олар орталык китапхана меканында бу йыл Кадрия атындагы орта мектебине биринши класска бараяк – Гасан Шавлуковты эм уьшинши класска бараяк – Аиша Ниязовады мектебке барганда керекли амалламалар ман канагатладылар, суьйинттилер. «Бир
саьбийдинъ суьйиниши – мынъ баьлединъ алдын шалады» дегенге усап, бу куьн этилген ис савапка язылсын деп айтпага суьемен.
Конаклар келген куьн китапхана меканында уьйкен байрамга айланды. Олар балалар ман хабарладылар, мыратларын да билдилер, савгады да тапшырдылар.
Алдыда окув йылы. Сол уьстинликли оьтсин аьр кимге де…
Г.Курганова.
Суьвретте: китапхана куллыкшылары савга тапшырганнан сонъ.