Россия Федерациясынынъ байрагынынъ куьни яздынъ ызгы айы – 22-нши августта байрамшыланады.
Байрам Россия Президентининъ 1994-нши йылдынъ 20-ншы августындагы 1714 номерли «Россия Федерациясынынъ Патшалык байрагынынъ куьни акында» деген Указы ман беркитилген.
Аьр йыл сайын, бу куьн Россия Элининъ туьрли ерлеринде шатлыклы шаралар оьткериледилер. РФ байрагынынъ куьнине багысланган шатлыкларда элдинъ баьри гражданлары да катнасадылар.
Россия байрагы оьз тарихин 1693- нши йылдан патша Биринши Петрдынъ заманыннан баслаган. Уллы Петр оьзининъ кемесинде уьш туьсли байракты коьтерген эм баьри савда кемелерине соны салмага буйырык берген. 1896-ншы йылда, патша II Николай такка олтыраяктынъ алдында, бу байракка Россиядынъ патшалык байрагы деген белги берилген.
Россия байрагынынъ куьни болса, оьз тарихин 1991-нши йылдынъ 22-нши августыннан баслаган. Сол куьн Москвада август путчы деп айтылган куьнлерде кызыл совет байрагы орынына Ак уьй деп айтылган мекан уьстинде уьш туьрли туьсли байрагын коьтергенлер. Сол
ок куьн РСФСР Оьр Советининъ токтасы ман РСФСР штандарты акында токтас кабыл этилинген.
Аьлиги заманда баьри де патшалык учреждениелер фасадларында уьш туьсли Россия Элининъ байрагы елпилдейди. Россия байрагы солай ок кайбир документлерди де безеклендиреди, Сый грамоталар, Дипломлар, савгалар документлерининъ сыйлы ерлеринде орынласады. Элимиздинъ бас белгиси патшалык оьлшеминде оьткерилетаган йолыгысларында, спорт ярысларында, конференцияларда да кулланылады. Байраксыз
политикалык шаралар, митинглер, юрислер, курултайлар да оьткерилмейди.