Терроризм мен куьресуьвде макулласув куьни… Бу куьнди Элимиз 20 йылдан бери белгилейди. Кайгылы, муьнълы, коьзяслар коьлдей акты, коьплеген, яшавдынъ ашшысын, таьтлисин толысынша татпаган саьбийлердинъ каны куйылган заман (1–3 сентябрь 2004-нши йыл). Мутылмайды бу кара булыт капланган куьн. Беслан. Эс. Дайым тири. Соннан бери де 21-нши йыл оьтип барады. Йыл сайын сол террористлик акт бойынша увылларын, кызларын йойган ата-аналар, ювыклар, окытувшылар, баьриси де сол ерге келедилер, зыярат коьредилер… Сол куьннен сонъ, 2005-нши йыл бу календарь белгиси
де токтастырылган…

Терроризм – экстремизмнинъ энъ де кавыфлы кеби. Террористлик кыянатлыкка террористлик акт, есирге аьдемди алув, савыт-садаклы куьплерди туьзуьв, ава яде сув коьлигин урлав, акашув киреди. Солай ок бек маьнели кыянатлык – оьтириктен террористлик акт болаягы акында билдируьв. Экстремизмге эм терроризмге карсы турув тек патшалыктынъ тувыл, гражданлардынъ эм ямагаттынъ борышы да болады. Терроризмнинъ кенъ яйылувы да бир политика. Аьдемлер терроризм аркалы ямагатты
коркытып, физический корлавга калдырадылар. Терроризмге карсы турувда савлай ямагат
биргелеспеге керек. Солай ок, ыхтыяр саклавшы органларынынъ терроризмге карсы этилетаган куллыкларын анълап, оларга колтыклав этпеге керекпиз.
Бизим аьр биримиз, терроризмге карсы турув йорыкларды билип, байыр эм ямагат кавыфсызлыкты сакламага борышлымыз. Биз балаларымызды да сол затлар ман яслай
таныстырмага керекпиз, эгер террористлик акт болатаган болса, ол оьзин кайтип юритуьвди билсе, пайдалы. Ама балаларды кайтип уьйретсек те, олар кимге де сенедилер,
ким мен де тез катнасып кетедилер. Биз оларды яман затлар айтып, коркытып, турмага
керек тувылмыз, тек таныс болмаган аьдемлерге сенмеге ярамайтаганын анълатув тийисли. Солай ок, таныс болмаган аьдемлерден савгалар да алмага ярамайтаганын билсинлер.
Терроризм мен куьресуьвде макулласув куьни белгиленгенде, коьплердинъ юреклери сызлайды. Коьз алдымызга бир неше йыл артында, ама бу куьнгидей эсимизде, Беслан каласында болган оьзгерис келеди.
2004-нши йылдынъ биринши кырк кийик айында балалар, колларына гуьл байламлар, туьрли туьсли шарлар алып, Янъы окув йылына абытлаган эди, биринши класска барганлар да сол санда, тек, оькинишке, коьбиси сол мектебтен артка абытларын алмадылар, аяклары ман кирген куьнасиз янлар, аркалары ман артка шыкканлар. 300- ден артык аьдемлер, яртысыннан коьбиси балалар террористлердинъ колларыннан янларын курманлык эттилер. Соннан бери аз заманлар оьтпедилер, сонда сувсыз, ассыз (уьш куьн узагында) караклардынъ колларыннан кеткен балалардынъ ата-аналарынынъ коьзяслары коьлдей агадылар, соннан бери йыл сайын бизим элимиз терроризмге карсы куьресте макулласув куьнин белгилейди. Ис борышыма коьре, мен де бу куьнге багысланган макалаларымды йыл сайын язатаган болсам да, тынышлы, коьзяссыз язып болмайман. Коьз алдыма сол куьнлерде орталык телеканаллардынъ коьрсеткен сюжетлери, аьлсизленген балалар, янларын салмага ер таппаган аналар коьринип турадылар…  Алла-Таала сондай затларды эки коьрсетпесин. Балалар тынышлы аспан астында оьссинлер. Биз болсак, тарихти
мутпай, сондай террористлик актларда ян бергенлерди эскермеге керекпиз. Таза аспанда
куьн нуры дайым яйнап турсын…
Галима Курганова,
РФ Журналистлер союзынынъ агзасы.