Ветеринар куллыкшысынынъ куьни элимизде 31-нши августта белгиленеди. Соьйтип ол бизде 2014-нши йылдан сонъ официаллы кепте кеспи байрамы болып келеди. Болса да ветеринар кесписимынълаган йыллардан бери белгили. Айванларды эмлев аьдемлерди эмлевден коьпке кыйынлы. Сондай исти тек шынты ак ниетли, таза танъ юрекли аьдемлер сайлайдылар.
Элимиздеги баьри де ветеринар куллыкшыларындай болып, Ногай район ветеринария управлениесининъ куллыкшылары да оьз ислерин намыслы толтырадылар. Буьгуьнлерге район бойынша уьй айванлары арасында юкпалы маразлар йок деп саналады. Район еринде уьй айванларына баьриси 9 ветеринар участоклары карав бередилер: Терекли,
Нариман, «Бирлик» (Батыр-Мурза), Кумлы, Бажиган, Куьнбатар, ОртаТоьбе, Карагас, Эдиге ветеринар участоклары. Соларда баьриси 50 аьдем куллык этеди. Айтпага, Кумлы авыл
ветеринар участогынынъ етекшиси Мурзабек Курганов, коьп йыллардан бери район бойынша коьримли ветеринарлар Юсурбий Джумагельдиев, Кизлярхан Муратова исин уьстинликли юритедилер. Тагы бир ветеринар куллыкшысы Арслан Амангазиев, ол да оьз еринде исине яваплы кепте каравы ман белгили. Соьйтип, район ветеринар куллыкшыларынынъ аьр бириси акында коьп ийги соьзлер айтпага болады эм айтылады.
Быйыл бизим ветеринарлар райондагы тувар малга эм койлар ман эшкилерге биркалар салув исин де юритедилер. Район ветеринария управленисининъ начальниги Кельдимурат Шамаров билдиргенлей, бу маьнели куллык быйыл 1-нши декабрьге кутылады. Оннан сонъ
малларына биркалар салдырмаган иелерине федераллык законы бойынша штрафлар салынаяк. Буьгуьнлерге район бойынша 28 011 тувар малга эм 228 809 койлар ман эшкилерге, 876 атларга биркалар салынган деп эсапланады. Бу яктан энъ ийги коьрсетимлерге Батыр-Мурза, Бораншы, Карагас, Куьнбатар эм Червленные Буруны авылларынынъ ветеринар куллыкшылары етискенлер. Кеспи байрамы ман байланыста Ногай район ветеринар куллыкшыларын ис байрамы ман кутлаймыз, оларга берк ден савлыкты, элге керекли исинде уьйкен уьстинликлерди, шат коьнъилди, аьеллеринде эмишликти эм наьсипти йораймыз!
М.Юнусов.
Суьвретте: Карагас ветеринар участогынынъ куллыкшылары ис уьстинде.
