Янъыларда Дагестан Аькимбасы Сергей Меликов профильли ведомстволар ара комиссия кенъесинде
региональлик власть органлар, ямагат организациялар эм фондлар етекшилери мен СВО катнасувшыларын эм олардынъ аьеллерин колтыклав соравын ортага салып ойласты. Ис куьнделигинде СВО катнасувшыларын эм олардынъ аьеллерин социаллык колтыклав соравы бар эди. Бас темалар санында – ер участоклар шыгарув, билимлендируьв льготалар, энергетика тармагында коьмек, солай ок «Аталыгымыздынъ коршалавшылары» фонды ман куллык этуьвди сайгаластырув. Сергей Меликов белгилегенлей, биринши куьнлерден алып республикада элимиздинъ президентининъ тапшырмалары ман келисте этилинмеге керекли коьмектинъ туьрли дережели тармагы туьзилген. Карарланган шаралар комплекси заман-заманы ман кенъейтиледи, а регион бюджетининъ эбин эсапка алув ман СВО катнасувшыларга тоьлевлер арттырылады.
«Йылдынъ басында Коршаланув министерствосы ман контракт беркитип, резервте турганларга бир
кере берилетаган тоьлевди эм оьз эркли туьзилислерге, бас деп «Каспий» батальонына, контракт беркиткен гражданларга 300 мынъга дейим арттырув акында указга кол басылган. Аьлиги заманда СВО барысында яраланып, сакатлык алганларга 300 мынъ маьнет акша оьлшеминде бир кере берилетаган тоьлевди токтастырув соравы ойласылады», – деп хабарлады регион етекшиси.
Онынъ билдируьви мен, СВО катнасувшыларын эм олардынъ аьеллерин яклав соравлары бойынша этилетаган куллыктынъ пайдалыгын арттырув уьшин толтырувшы власть органларынынъ, муниципалитетлердинъ эм ямагат организациялардынъ аьрекетин сайгаластырув бойынша ДР
Аькимбасынынъ эм Оькиметининъ Администрациясында айырым боьлик туьзилген. Аьлиги заманда ол кадрлар ман толыстырылады. Сондай Комитет ДР Халк Йыйынынынъ Аппаратында да аьрекет этеди. Республика етекшиси согыс спецоперациясы Енъуьв мен тамамланаягын, ама ветеранларды эм олардынъ аьеллерин яклав эм колтыклав соравлары аьли де коьп йыллар узагында приоритетлилер санында болаягын эске салды. Онынъ белгилеви мен, аьскерлик сулыбы бар аьдемлер куллыксыз калмага керек тувыллар, а яклав шаралар келеектеги ветеранларга да яйылаяк. Баьри власть органлары, С.Меликовтынъ соьзлерине коьре, аьскершилер эм олардынъ аьеллерининъ керексинуьвлерине дайым да табылмага эм олар уьшин ашык болмага кереклер.
