Дагестан Аькимбасы Сергей Меликовтынъ басшылавы ман регионда муниципаллык
сайлавларга аьзирлик коьруьвди уйгынлавда эм озгарувда сайлав комиссияларга себеплик этуьв бойынша исши куьбининъ кенъеси болып озды. Сайлавлар быйылдынъ 12-нши – 14-нши сентябрь куьнлеринде озгарылаяк.
«Ол – Дагестанда энъ уьйкен оьлшемли сайлав кампаниялардынъ бириси. Тавыс беруьв бирлик куьнининъ бас борышы – республикамыздынъ баьри яшавшыларына оьзлерининъ сайлав ыхтыярларын яшавга шыгарувга эп беруьв. Бу исте ортакшылайтаган баьри ведомстволар эм власть органлары шараларды озгарувга онъланганлар», – деп белгиледи Сергей Меликов. Республикалык сайлав комиссиясынынъ председатели Магомед Дибиров белгилегенлей, тавыс беруьв бирлик куьнинде, ваькилли власть органларына 588 депутатлардынъ сайлавын эсаплап, 609 муниципаллык сайлав кампаниялар эм 21 поселениелер аькимбасларын сайлавлар оьтеек. Сайлавлар барысында 6001 депутатлык мандатлар уьлестирилеек.
Сайлавшылар санына 1 миллион 312 мынъ аьдемлер киргистилген. Болжалдан алдын тавыс беруьвди Махачкаладынъ Киров районынынъ Чечень аралынынъ яшавшылары уьшин уйгынлаяклар.
Баьри участоклар да керекли техника ман, байланыс амаллары эм электроканагатлавдынъ резервли булаклары ман яракландырылган. Депутатка кандидатлар этилинип 10 мынъ аьдем коьрсетилген.
ДР-нынъ Оькиметинде 11-нши – 15-нши сентябрь куьнлеринде оперативлик штаб туьзилеек. Соны ман бирге ДР Аькимбасы эм Оькимет Администрациясынынъ структурасында республикадынъ сайлав комиссиясы ман биргелес аьрекетлев бойынша исши куьп туьзилмеге керек. Сондай тапшырма берди кенъес сырагылары бойынша регион етекшиси.