Спорт. Соны ман кеспили аьрекетти бардырган эр киси куватлы, касиетине коьре йигерли, оьзин тийисли ерде ыслап болган, коьнъилин де толы кепте ашпайтаган аьдем болып тербияланады. Элбетте, ога касиет яктан да коьп зат коьндириледи деп айтпага болады. Кеспили спорт пан каьрлеген аьдем маданият коьрими болмага да тийисли, неге десе ога уьйкен спортка йол шыкса, ол Элин, Аталыгын, Тувган ерин яклавшы болады.
Ногай шоьлининъ ийги атагын шыгарган яс йигит Шамиль
Кельдимурат увылы Нургишиевтинъ тагы да бир уьстинлигине суьйинемиз. Карагас авылыннан болган Шамиль оьткен йылларда Дагестан Республикасынынъ чемпионы деген атка – доьрт кере, Россия чемпионы деген атка – уьш кере эм Европа чемпионы деген атка бир кере тийисли болганы белгили эди. Бу куьнлерде ол Таиланд еринде оьтетаган кеспили куьреслерде ортакшылык этип, сол ердинъ спортсмени мен сынаска шыгып, «Bangla Stadium» чемпионлык белбавынынъ иеси болды. Куьрес енъиллерден тувыл эди, ама шоьллигимиздинъ авыр ава шартларында биринши спорт карувын алган йигитимиз бу куьнги куьндесин куьни-бурын, ога бир амал да калдырмай, енъди. Шамильдинъ биринши тренери Бекболат Янакаев эди. Ол – буьгуьнги уьстинликли спорт чемпионын яслай спорт пан аьвликкенин, онынъ кайтип йигерли абытын алганын коьрген аьдем. –Шамильдинъ уьстинликлери алдыда коьп болаягына бек сенетаган эдим эм спортка келген аьр кайсы аьдемнинъ де уьстинлиги оьзининъ колында болады. Коьп ислесе, уьстинликке етиседи, эгер оьзи де сайлаган каьрине ушкары караса, бар куьши де, куваты да соьнеди, – дейди тренер. Белгилеп озайым, ис аьрекетиме коьре, яс спортсменлер, олардынъ етимислери, енъуьвлери акында язбага туьседи. Ногай районымызда яслардынъ спорт яктан оьрленуьвине куьш салатаган тренерлер аз тувыл, сол санда Бекболат Янакаев те
бар. Ол тербиялайтаган яслардынъ коьбиси чемпион деген атка тийисли боладылар.
Шамиль де оны ман бирге спортка кирген йигит болады. Аьлиги заманларда Шамиль
Нургишиев Сургут каласында яшайды эм сонда спорт карьерасын да бардырады.Талаплы
спортсмен мен буьгуьнлерде тренер Гриненко Илья Сергеевич каьр шегеди, ога спорттынъ
тайский бокс кебининъ янъы сырларын ашады. Аьлиги заманларда Шамиль
Кельдимурат увылы оьзининъ тренери мен бирге Таиландта Пхукет аралында оьтетаган
сборыларында ортакшылык этеди.Сол да ога уьйкен сулып береегине, уьстинлигине косым
болаягына шек йок. Шамильге сонда тагы да бир куьресуьвге шакырув этедилер эм ол «Patong Boxing Stadium» белбавы уьшин куьреске шыгады, тагы да енъуьвге тийисли
болады. Шамильди ак юрегимизден сол енъуьви мен кутлаймыз, алдыда Олимпия чемпионы деген атты яклаганда сагынамыз. Уьстинликлеринъ мол болсын, сыйлы ердесим!
Г.Сагиндикова,
РФ Журналистлер союзынынъ агзасы. Суьвретте: Ш.Нургишиев (онъда).