Абдулкадыровлардынъ тукымы алдынгы заманларда тек Червленные Буруны авылына тувыл, савлайы Ногай шоьлге, республикага, уьйкен элимизге де белгили эди. Олардынъ уьйкен атайы – Ярыкбай Абдулкадыров авылдынъ эм районымыздынъ тарихи эм данъкы, сав яшав оьмири узагы баслап ерли байларда, сонъында Совет власти келгенде 2-нши номерли совхозында, сонъ «Червленные буруны» оькимет заводында атаклы йибек юнли, районымыздынъ оьктемлиги «Грозненский меринос» йыныслы койларды шыгарувга эм оьстируьвге багыслаган. Тувган Элимиз онынъ кыйынына йогары белгисин берген эм Социалист Истинъ Баьтири деген патшалык савгасын тапшырган.
Оьзлерининъ уьйкен атайынынъ сыйлы атын буьгуьнлерде онынъ балалары, уныклары, немерелери эм йиенлери тоьмен туьсирмей юритедилер. Ярыкбайдынъ увылы Николай Абдулкадыров (яткан ери
ярык болсын) коьп йыллар узагында Червленные Буруны авылдынъ орта мектебинде окытувшы болып ислеген эм район еринде ийги педагоглардынъ бириси деп саналган. Николайдынъ увылы Денис Абдулкадыров муннан бир неше йыллар артта контракт бойынша аьскер куллыгына кеткен эди. 2022-нши йылдынъ 24-нши февралинде ол оьзининъ аьскер боьлиги мен бирге ол заманда Украина эсабында болган орыс ери Донецк Республикасына бириншилерден болып кирген. Бириншилерге кайсы заманларда да кыйын болады. Сол куьнлерге коьре, аьли де согыс сулыбын шынты кепте алмаган аьскершилер бир хыйлы кыйынлыкларга йолыкканлар, болса да олар соларды шынты эр кепте оьткенлер эм явларга оьзлерининъ ким экенлерин коьрсеткенлер. Соннан 5 ай оьткен сонъ оларды фронттынъ алды ягыннан кери кайтарадылар. Муннан сонъ Дениске бир кесек
заман узагында Москвадагы, Пятигорсктеги, Грозныйдагы госпитальлерде ятып эмленмеге туьсти. Медиклердинъ берген сырагысы бойынша оны сонъында савлыгы бойынша «В» категорияга шыгарганлар. Аьлиги заманда Денис Абдулкадыров Наур авылындагы аьскер боьлигинде куллыгын армаган бардырады.
Буьгуьнлерде специальли согыс операциясы юрип турган ерлерде Ногай шоьллигиннен 200-ден артык йигитлер катнасадылар. Олардынъ биревлери савлыгыннан тура тувган ерлерине кайтарылганлар, баскалары дав сызыгында янъы нацистлерге карсы турып, аьлиги заманда янъыларда Россияга кирген субъектлердинъ ерлерин явдан босатадылар. Оьзгелери Денистей болып, аьскер боьликлеринде куллык этип, элин коршалав исине оьз уьлисин косадылар эм аьр заман да согыс тапшырмасын толтырмага аьзир болып турадылар.
М-А.Ханов.
Суьвретте: Денис Абдулкадыров.