Ямагат яшавында туьрли кеспилер бар, олардынъ баьриси де маьнели деп айтсак, янъылыс болмас. Солардынъ ишинде баскаланатаган да бар – ол Аталыкты коршалав ман байланыслы аьрекет. Офицерлер иси – куьшли, йигерли аьдемлердинъ куллыгы, олар уьйкен согыс боьликлерди басшылап боладылар, солардынъ аьрекетин бир ниетке, бир ойга келтиредилер. Сол кеспиди
сайлаганлар анълайдылар, бу куллыкта бас орында яваплылык турады. Кыйынлы аьлде офицер оьзининъ мойнына салады алынмага керек карарды. Эгер ол дурыс карар алса, куллык та юрер, алдыга салынган борышлар да толтырылар. Офицер – ол тек кеспи тувыл, ол инсаннынъ бактысы, сол яшавда инсан оьзин аямай, Аталыгы, тувган Эли уьшин куьш салады.
Дагестан Республикасынынъ Ногай районынынъ Нариман авылынынъ яшавшысы Арсен Заурбек увылы Янгишиев ерли мектебте окыган, сонъ Пермь каласында Россия Федерациясынынъ Национальли Гвардиясынынъ согыс институтын битирген. Бу йогары окув ошагы 1981-нши йылдынъ караша айында туьзилген. Институт Росгвардиядынъ сырасына киреди, ол Нацгвардиядынъ аьскерлерине куллык этуьв уьшин офицерлерди аьзирлейди. Аьрекет эткен заманы ишинде институттынъ 65 выпускниклери алтын медальлер алганлар. Эки юзден артык офицерлер Биринши эм Экинши шешен кампанияларда катнасканлар.
Оькинишке, олардынъ арасында ян бергенлер де бар. Буьгуьнлерде де институттынъ выпускниклери СВО еринде катнасадылар. Окув йылларында Арсен Янгишиев боьлик командири болган, званиеси – сержант. 2022-нши йыл йогары окув ошагын битирип, Казань каласына 26-ншы айырым специальли отрядка туьскен. Сол отрядтынъ сырасында согыс спецоперациясына кеткен. Буьгуьнлерде ердесимиз
СВО еринде яв ман куьреседи, енъуьвди ювыклатады. Арсен Янгишиев 2023-нши йылдан алып СВО еринде. Янъыларда тамада сержант Арсен Янгишиев коьрсеткен йигитлиги уьшин 3-нши дережели
медали мен савгаланган.
– Биз акыйкатлык, аьдиллик уьшин согысамыз, керек болса, биринши болып турармыз кыйынлы аьллерде, соьйтип биз йолдасларымызды, тувган элимизди куткарармыз, – дейди офицер.
Казань каласында аьскершиди хатыны Алина, ол врач болып ислейди, кишкей увылы Муслим куьтедилер. Биз Янгишиевлердинъ аьелине баьри ийгиликлерди йораймыз. Ясларымыз уьйге енъуьв мен кайтып келсинлер.
Г.Бекмуратова.
Суьвретте: А.Янгишиев.