Акыллы инсанлардынъ бириси айткан: «Аьскерши ийгиликтинъ, аьдилликтинъ, суьйимнинъ законлары бойынша куллык этпеге тийисли, ама керек заманда колына кылыш алып, яманлыктынъ куьшлерин йойытув ниет пен согыспага – киели борыш».
Буьгуьнлерде бизим йигитлер, Аталыктынъ коршалавшылары яманлыкка карсы кылышларын кыннан шыгарып, оьз янларын курманлык этедилер. Олар бизге аьр заманда да баьтирликтинъ коьрими боладылар. Аьскершидинъ йолын йигитлик пен оьткен ердеслеримиздинъ бириси – Эмиль Мухаметдин увылы Кочекаев (яткан ери ярык болсын). Асылы ман Кочекаевлер Нефтекум районынынъ Коясыл авылыннан. Мухаметдин Кимал увылы эм Светкан Юсуп кызы Кочекавлерде эки бала тувып-оьсти – Эмиль эм Зарина. Балалар бираз оьскенде, аьел Нефтекумск каласына коьшти. Бес йылдынъ артында аьзиз анасы дуныядан кешти, сол кайгыдан аьли де битпеген ярага тагы да туз себилди – СВО еринде Эмиль йигитлерше ян берди.
– Эмиль ийги, танъ, оьзден, аьдилликти туткан, осалларды коршалавды бас орынга салатаган, баьрисине де ашык аьдем эди меним суьйикли аданасым. Яраланып ятканда да, согысувлар болаяткан ерге бармага алгасайтаган эди, токтап болмады, оьз йолдасларына, кабыргалары сынык болса да, кетти. Бирге согыскан йолдаслары Эмильди ийги аьскершилердинъ сырасыннан деп айтадылар. Бизге, ювыкларга, бу – айлак та кайгылы йойым, – деп хабарлайды аданасы акында Зарина Кочекаева.
Эмиль кырк ясына да толмады. Уьйде тунъгыш бала, ол яваплылык пан карайтаган эди ювыклары акында каьр шегуьвине. Нефтекумск каласында мектебти битирип, сол каладагы региональли политехнический колледжге туьседи эм «токарь-универсал» кесписин байырлайды. Сонъында Ставрополь каласында да окыган, «технолог машиностроения» кесписин алган. Сырт Осетия Республикасында Алханчурт поселогында эр борышын толтырган. Сонъында Арменияда да Гюмри каласында куллыгын бардырган.
Рядовой, водитель, пехотадынъ согыс коьликлерининъ оператор-наводчиги, Москва каласында «Рено» заводында каравылшы, автокоьликлерди йыйнавшы болып ислеген. Эмиль Кочекаев ызгы йылларда Нефтекумск каласында УФСИН инспекторы болып куллык
эткен. Эмиль 2015-нши йыл оьз бактысын армия ман байланыстырмага токтасады. Сол йыл караша айында Ростов-наДону каласында контрактка кол басады, бираз заманга армияды койган куьнлери де болды, ама турып болмай, кайтып келди. Элге яв келсе, эр киси атланмай болмайды. Соьйтип, СВО ерине Эмиль оьзи мен коьплеген йыллар бирге юрген
согыс йолдаслары ман Аталыкты сакламага кетеди. Эл алдында борышларды ол ызгы тынысына дейим толтырган эм каты согысувлардынъ бирисинде отты
оьзине биринши болып алып, йолдасларын саклайым деп, атылган ядырадан ян берген йигерли аьскерши Эмиль Кочекаев.
Сол эди аьскерши мен сайланган йол. Торецк каласын босатувда уьстимиздеги йылдынъ 1-нши августында Эмиль Кочекаев ян берген, ол штурмовой батальонынынъ операторы болып ислеген. Йигерли аьскерши Йигитлик ордени мен (оьлгеннен сонъ) савгаланган.
Эмильдинъ позывнойы «Ногаец» эди. Йиплерден согылган Чебурашка ойыншыкта оьз позывнойын, соны ман бирге «Элде, тилде, динде бирлик» деген шыкырувымызды да язган, оьзи мен алып юретаган болган. Оьз халкы, Эли, Аталыгы уьшин ян берген ердесимиз. Сол тувыл ма эр кисидинъ бас ниети, ойы эм борышы. Перс шаири Саади айткан «Йигитлик – ол куьш тувыл, кылыш пан согысув сулыбы да тувыл, ол – оьзин юритип болув, аьдил болув». Аьдиллик уьшин согысадылар бизим йигитлер, савлай дуныяда тынышлык болсын деп, аьллерин калдырып, куьшин, янын аямайдылар. Оькинишке, яс янларын бередилер.
Мен Зарина Мухаметдин кызына, онынъ атасына, баьри ювыкларына аьзиз аьдемин йойытканына бассавлык йорайман, калганлар аман турсынлар. Тынышлыкты куьтемиз баьримиз де, оьтер йыллар, бу согыстынъ канлы куьнлери дайымларга бизим юреклеримизди куьйдирсе де, элимиздинъ йылязбасынынъ данъклы бетлери болып калар.
Сол да бизге Эс, сол да бизге Йигитлик.
Гульфира Бекмуратова, Россия Язувшылар союзынынъ агзасы.
Суьвретте: Э.Кочекаев.