Ызгы заманларда Терекли-Мектебтеги атаклы паркты яшавшыларга онъайлы этуьвге, коьрклендируьвге уьйкен эс берип келедилер. Айтпага, тек кесек заманнынъ ишинде тротуарларга плита тоьселди, онъайлы эм ыспайы олтыргышлар салындылар, шыраклар ягылдылар, баьри де яраклары ман балаларга ойнамага майдан туьзилди.

Бу затлар баьриси де, соьзсиз де, район орталыгымызды ыспайлайдылар. Тек онъайлыклар бир кере курылган ман болып калмайды, оларды куьнлекуьнлик карав берип, тийисли дережеде саклав керек болады. Аьне сол куллыкты арымай-талмай этедилер паркка карав беретаган куллыкшылар. Олардынъ куьнле-куьнлик аьрекети аркасында биз эртен турып ярасык парк пан сукланамыз, онынъ таза орамлары ман юремиз.

Парк куллыкшыларынынъ аьр кайсысы оьзине тапшырылган исти тийисли дережеде толтырадылар. Сонынъ уьшин де парктынъ тазалыгы уьшин яваплы Емисхан эм Марина Аджиниязовалардынъ, Еминат Ярлыкаповадынъ, Залина Янгишиевадынъ аьрекетлерининъ хайыры тоьгеректеги тазалык аркасында бизим коьнъилимизге нур себеди.

Паркта куьн сайын этилмеге керек болатаган куллыклар шыгып туратаганын биз коьзимиз бен коьрип турамыз, шайыт боламыз. Парктынъ куллыкшылары Аскер Апшиков, Салим-Солтан Муждаков, Камиль Муллаев дайым кайдай болса да бир куллык этип турадылар: татавыллар ман тереклерге сув йибередилер, оларды тазалайдылар, курыган тереклерди шабадылар, номай биткен оьленди шаладылар, баскалай кыйшыкларды туьзетедилер. Олардынъ этетаган ислерининъ аьр кайсысын атап олтырсам, айлак коьп заман алаяк.

Терекли-Мектебтинъ яшавшылары эм конаклары, ыспайы эм онъайлы парк ишинде юргенде яде ял алганда коьнъиллерининъ ийги болганына парк куллыкшыларына разы болатаганына шексинмеймен.

Н.Кожаева.

Суьвретте: парк куллыкшылары.