Терекли-Мектеб авылынынъ орта район китапханасында туьрли миллетлер эм дин ваькиллерине сый этуьв, солай ок Россиядынъ коьпмиллетли халклары акында билимди оьстируьв ниет пен «Дагестан халкларынынъ аьдетлери эм маданияты» деген тема бойынша интеллектуальли турнир-ойын оьтти. Шарадынъ бас борышы – тувган ери акында билдируьвлерди таралтув, Дагестанга суьйим, оьктемлик сезимлерди тербиялав. Квизойыннынъ катнасувшылары тек оьз билимлерин тергеп калмай, республикамызда яшайтаган халкларынынъ яшав-турмысы, аьдетлери, тарихи акында коьп затлар билдилер. Турнир ерли яшавшылары арасында халклар ара макулласувды эм анъламлыкты беркитуьвге демевлик этти. Орта район китапханасынынъ куллыкшылары шарады Дагестан халкларынынъ бирлик куьнине багыслаганлар. Коьз алдымызга табиатты аькелейик – ап-ак кардан боьрклер кийген бийикликлер йогарыга ымтылган, бурынгы тастан ясалган авыллар тавлар ман бир болып калганлар. Бу ерде аьр бир аьвелгиден калган тас, шоьл буйратлар мынълаган тарихи акында эс саклайдылар, аьр яшавшы оьз халкынынъ аьдетлерин тутады. Кавказдынъ юрегининъ оьзегинде орынласкан Дагестан коьплеген этнослардынъ маданиятларын бирлестирген. Соьйтип, ярасыклы бурынгы эм аьлиги Дагестан акында айтылды турнирде. Ойында уьш командалар ортакшылык эттилер – «Джанибековцы» (Терекли-Мектеб, Джанибеков атындагы мектеб, етекшиси Фарида Отевалиева), «Патриот» (Нариман, А.Асанов атындагы мектеб, етекшиси Мухминат Арсланова), «Знатоки» (Калининаул, С.Капаев атындагы мектеб, етекшиси Эмилия Абдулгапова). Турнирде алты раунд эди – «Халклар», «Ногай районы», «Маданият эм аьдетлер», «Белгили инсанлар», «Баьри заттынъ акында». Жюри сырасында Ногай районынынъ аькимбасынынъ коррупцияга карсы турув бойынша коьмекшиси Руслан Аджиев, шаир, журналист Гульфира Бекмуратова, «ЦРБ» МКУ директоры Сабират Абубекерова катнастылар. Ойын бек кызыклы эди, соравлар дурыс этилинип туьзилген. Турнирди библиограф Наргиза Абдурашева юритти. Балалар белсен катнастылар, оларга баьри зат та кызыклы эди. Ойын баьримизге де балалар оьз ерин суьетаганын, онынъ тарихин билетаганын коьрсетти. Биринши орынды «Патриот» командасы алды, экинши орынга – «Джанибековцы» командасы эм уьшиншиге «Знатоки» команда тийисли болдылар. Шарадынъ спонсоры – «Арсланбековская сельская администрация» авыл поселениеси. Мундай шараларды оьткеруьв келеектеги несилди тербиялавга бек маьнели, неге десе аьр бир аьдем оьз халкынынъ тарихин билмеге эм киши Аталыгын суьймеге керек. 

Г.Бекмуратова.

 Суьвретте: енъувши командадынъ катнасувшылары.