95 йыл. Заьлимдей болжал. Ногай тилимизде сол шаклы йыллар дуныя ярыгын коьрип келеди бу куьнлерде «Шоьл тавысы», алдынгысы «Кызыл байрак», «Шоьллик маягы» суьйикли газетамыз. Сол яшав кезеги ишинде дуныя да бир неше кере туьрленди, не шаклы согыслар ер юзинде болдылар, бизим Аталыгымызга сансыз коьп кере яв шапкынлык та эткен… Коьп затты, туьрленисти коьрип келетаган газетамыз бу куьнлерде оьзининъ мерекесин белгилейди. 1931-нши йылдынъ караша айынынъ 10-ншы куьнинде газетамыздынъ биринши номери дуныя ярыгын коьрди. Газетадынъ кеби соннан бери туьрленди, оьлшеми де оьсти, олай дегеним, эки бетли газетамыз аьлиги заманда сегиз бетке дейим етти. Сонынъ болувы акында айтатаган болсак, не шаклы аьдемлер бу ис коллективте ислегенлер, аьр бирисининъ аты бизге баалы эм, мырсатымызга коьре, мерекели номерлеринде олар акында язып, окувшыды оны ман таныстырып, макалалар шыгармага шалысамыз. Газетамыздынъ яратувшылык йолы сыланъ болмаган, кыйынлыклар да аз тувыл эди. Бу тармакта бир неше ис орынларда ислеген аьдемлер де бар. Сондайлардынъ бириси – Алев Атабай увылы Алимов. Алдынгы заманларда – ол меним куллыгым тувыл, – деп айтаган аьдемлер йокка эсап эди, колыннан келгенин аьр бириси аямай, аьдемшилик кебинде этип турганлар. Алев Атабай увылы газетамыздынъ ис коллективинде фото-суьвретшиден алып етекшиге дейим еткен куллыкшы болады. Алев Алимовтынъ аты газетамыздынъ тарихинде кенъ белгили, онынъ калеми астыннан шыккан макалалардынъ темалары айлак кенъ эм кызыклы болган. Ол коьп йыллар узагында газетамыздынъ ямагат-политикалык боьлигин етекшилеп келди. Оьзи де айлак терен билимли инсан эди. Мен оны ман айлак ювык таныс эдим деп айтып болмаман, ама таныс тувыл эдим деген айлак та келиссиз. Мен сыйлы ясуьйкенимиз, ис сулыбы айлак бай аьдем мен газета редакциясында практикамды оьткенде, оннан сонъ оьзим баска тармакта, баска ис орында ислегенде, мунда конакка келетаганымда аз распаганман, онынъ соьйлеген соьзин, арасында маскарасын да этиткенмен. Мен бу ис коллективке келгенде, Алев Атабай увылы авырсынып турган заманлар эди. Ис йолдаслар онынъ акында коьп соьйлейтаган эдилер, оьзлери тез-тез конакка да бармага суьетаган эдилер, солар ман бирге мага да онынъ уьйинде конак болмага амал болган. Ясуьйкен авырувга енъ бирден эки бермеди, онынъ сол заманда соьйлеген соьзлери, хабарлары, коьзкарасы эсимде калган. Ол яшавга терен сезгир коьзлери мен карайтаган аьдем, аьр бир соравга тувра явап та беретаган, яшавдан оьзине не керегин билетаган инсан экен, деп ойлаган эдим сол заманлар да. Соннан бери аьли коьп заманлар оьттилер, ол оьзи арамыздан тайганлы да 19 йыл болды, мен де яшав сулыбын алдым, ама ойым сол кепте, туьрленмейди. Бу инсан мага журналист кайдай болмага керек дегеннинъ мысалы болады. Онынъ язган язувлары оьз теренлиги мен, соьз байлыгы ман окувшыды аьвликтирип болган. Мен онынъ макалаларын неше йыллардан сонъ да кайтарып окыйман, шебер тили, шешен соьзи сукландырмай болмайды. Алев Алимов пан бирге ислеген йолдаслар арамызда аьлиги заманларда да куллык этедилер, газетамыздынъ иштелигин коьтеруьв, исти онъына бардырувга куьш салатаганлар Любовь Уразаева, Магомбет-Али Ханов, Гульфира Бекмуратова, Гульмира Нурдинова, баьриси де онынъ туврашыл касиети, коьрки акында айтадылар. Ол коьплерге коьрим болган, арамыздан коьпте кеткен болса да, онынъ ийги аты аьли де газета куллыкшылары арасында айтылады, сол тувыл ма сый деген. Бар аьдемлер, оьлгеннен сонъ топыракка айланган, бар аьдемлер, оьзлерининъ сыйлы данъкын оьмирлерге калдырган. Алев Атабай увылынынъ аты халк эсинде оьмирленген. Онынъ спорт пан каьр шегуьви акында да Ногай районда, онынъ тысында аьруьв биледилер. Шахмат ойыны онынъ суьйикли спорт кеби эди. Аьли де онынъ эстелигине багысланган турнирлер оьтедилер, сога коьбисинше онынъ аьели куьш салады… Газета онынъ яшавында уьйкен тоьрди бийлеген эди, сыйлы аты тарихте сакланады. Оьтер оьмир, авысар йыллар, ама сондай инсанлар газетады эткенлер, сол шаклы йыллар сакланувына оьз куьшлерин косканлар деп айтылар. 95, 100, 150 йыллык газета мерекелери белгиленерлер, биз болсак та, болмасак та, газета яшар, халкым оьрленер, газетады болдырганлар атлары оьмирленер…

 Галима Курганова, РФ Журналистлер союзынынъ агзасы. Суьвретте: А.Алимов (ортада) ис йолдаслары ман.