Газетамыздынъ аьр кезекли номери – ол коьплеген аьдемлердинъ ис аьрекети. 95 йыл ога алал болган окувшылары ман тар байланыста болып келуьв – ол бек коьрнекли, абырайлы бакты акында айтады. Сол йыллар ишинде газетамыз бан окувшылардынъ бир неше несиллери тар байланысын уьзбей келедилер. Бир оьмирге ювык газетамыздынъ бетлеринде бизим тувган еримиздинъ, ногай шоьлде ерлескен авылларынынъ коьрки, онда оьткен туьрли оьзгерислери, олардынъ коьримли, ислери мен халкынынъ атын данъклаткан аьдемлери, туьрли согыс оьзгерислердинъ йигитлери акында язылып, районымыздынъ тарихи кепленип барады. Ана тилимиздеги газетамыздынъ оьз сайты эм социаллык тармакларында куьплери де белсенли аьрекетлейди, соны ман байланыста ердеслеримиз, районымыздынъ тысында болса да, тувган еринде оьтетаган оьзгерислер, янъылыклар ман танысып, дайым газетамыздынъ касында болып, онда оьз ойлары ман да боьлиспеге де амаллары боладылар. Сол коьп йыллар бойы окувшылар сырасыннан таймай эм биринши кере язылып газетадынъ алал дослары болып келгенлерге биз уьйкен разылыгымызды билдиремиз. Ана тилимиздеги газетадынъ кезекли номерлерин, оьз яратувшылыклары ман боьлисип, бай эм кызыклы этуьвде белсенли катнасып келетаган штатта болмаган хабаршылары да айырым разылыкка тийисли. Солардынъ бириси – авыл хабаршысы, шаир, Дагестан Республикасынынъ Язувшылар союзынынъ агзасы Явгерет Дильманбетова. Ол газетамыздынъ йыйы конагы. Айтпага, ол неше йыллар бойы газетамыздынъ бетлеринде окувшыларды Шешен Республикасында туратаган ногайлардынъ етимислери, коьримли аьдемлери, озатаган кызыклы шаралары, оьзи язган янъы ятлавлары, доьртликлери мен йыйы таныстырувы ман газетамыздынъ шыгувында оьз уьлисин косып келеди. Янъыларда оьзининъ 70 йыллык мерекесин белгилеген язувшы Явгерет Нурадиловна Шешен Республикасынынъ Шелков районындагы 6 совхоз авылында Нурадил эм Танъбийке Дильманбетовлардынъ аьелинде тувган. Кыз тетеси Мутли эм акасы Юсуптынъ колында тербияланган. 8-нши класска дейим Кумлы авылда, оннан сонъ ТереклиМектеб авыл орта мектебинде 10-ншы класска дейим билим алган. Окытувшы болмага бала шактан суьйген кыз Махачкаладагы ДГПИ-динъ филологиялык боьлигин етимисли тамамлайды. Окытувшы кесписин байырлаган сонъ, ол Шешен Республикасынынъ Каршыга, Воскресеновское, Ногай районынынъ Калининаулында йогары классларындагы окувшыларга билим берип, сулыбын байытып келген. Ятлав язув оьнери Явгерет Нурадил кызында 7-8-нши классларда аянланды. Ол орыс эм ногай тилинде язганларын коьп кере газетамызда куллык эткен белгили ногай шаирлери М.Авезов, А.Култаев, М.Кожаевке коьрсетип, таныстырып, олардан да ятлав язувдынъ сыхырлыгына уьйренип келген. Буьгуьнлерде шаир – савлайы бес китаплерининъ авторы. Янъыларда ногай шаиримиз Явгерет Дильманбетовадынъ «Таьвесилмес эртегиси яшавдынъ – инсан» китаби, оннан алдын «Оьмир сесин янъыртып» деген ятлавлар йыйынтыгы эм язган макалалары кирген «Юреклерге ымтылув» деген эки китаплери Махачкалада китап баспасында дуныя ярыгын коьрдилер. Оннан алдын автордынъ «Йырла, домбырам, йырла!», «Алтын куьздинъ биюви» деген китаплери де баспадан шыгып, ногай окувшыларынынъ уьндиригинде орын тапкан эдилер. Онынъ биринши язган ятлавы «Данъыл шешекейлери» йыйынтыгында дуныя ярыгын коьрген. Тыншаювга кеткеннен сонъ, язув оьнери мен болган кыскаяклыдынъ язган макалалары, ятлавлары «Шоьл тавысы», «Ногай давысы» газеталарынынъ, «Байтерек» деген адабият-художестволык эм ямагат-политикалык альманахында баспаланып келедилер. Биз де Явгерет Нурадиловнады уьндиригимизде косылган янъы китаби мен, 70 йыллык сыйлы мерекеси мен ак юректен кутлаймыз, келеекте де газетамыздынъ бетлеринде окувшыларды кызыклы макалалары ман суьйиндирип, оьзининъ яратувшылыгы ман коьнъиллендирип келгенин йораймыз. Газетамызга болса, алдыда окувшыларынынъ саны оьсип, иштелиги байып, оьрленип келгенин, онынъ кепленуьвинде оьз уьлисин косып келетаган аьр кимге де яратувшылыгында бийик етимислерин сагынамыз.

 Г.Нурдинова. Суьвретте: Явгерет Дильманбетова.