Россия аьлимлери дуныяда энъ де биринши болып коронавируслы юкпалы маразына карсы вакцинады шыгарганлар. Миллионлаган аьдемлер вакцинацияды оьткенлер, онынъ пайдасы белгиленген, ама, оькинишке, коронавируслы юкпалы маразына карсы прививкады алмага керегинде шекленген аьдемлер де табыладылар. Олар булай айтадылар: « Прививка коронавируслы мараздан сакламайды, аьдем оны оьткенине карамастан, авырымага болады».

«Шоьл тавысы» республикалык газетасынынъ редакция куллыкшылары куьн сайын оьз окувшыларын бу авыр маразды басыннан аткарган аьдемлердинъ хабарлары ман таныстырып турадылар. Авыр авырувдынъ азабын шеккен куьнлери эм алган вакцинация акында оьз ойлары ман «Айланай» патшалык фольклор-этнографиялык ансамблининъ кассири Марина Ахмедьяева боьлиседи.
– Биринши кере коронавируслы юкпалы маразы ман мен 2021-нши йылдынъ курал айында авырыдым. Мараз бек авыр оьтти. Сол авыр куьнлер акында мага эскермеге де бек коркынышлы. Ногай район орталык больницасынынъ врачларына, медсестраларына эм санитарларына эткен коьмеги эм оьз савлыгын сынавга салып ислегенлери уьшин уьйкен савбол айтаман. Ийги болганнан сонъ, бир кесек заман озганда, мен вакцинацияды оьттим. Янъыларда мен тагы да авырыдым. Коронавирустынъ янъы штаммы «омикроннынъ» баьри белгилери – йоьткирик, тамак авырув, карув кетуьв, бурын битуьв менде болдылар. Авырув енъил оьтти, мага больницага бармага да керекли болмады. Мен уьйимде эмлендим. Буьгуьн мен биринши кере прививкады алганша эм вакцинацияды оьткеннен сонъ, экинши кере авырыгандагы аьлимди тенълестирип карайман. Сога коьре, эш бир кишкей де шекленмей, прививка мараздынъ авыр оьтуьвиннен бизди саклайды деп айтпага боламан.
Аявлы ердеслер! Коронавируслы юкпалы маразына карсы прививкады алынъыз, кавыфлы мараздан оьзинъизди сакланъыз. Сол авырув энъ де аявлы – яшавды аькетпеге болады. Бу мараздынъ авырлыгын шеккеннен, вакцинацияды алган не шаклыга да ийги», – деди Марина Ахмедьяева.