Москвада, 1-3-нши навруз куьнлеринде, РФ Федерация Советинде Дагестан Республикасынынъ куьнлери болып оьттилер. Сонынъ бас шаралары акында Ногай район администрациясынынъ аькимбасы Мухтарбий Аджеков айтып билдирген.

РФ Федерация Советинде болып оьткен Дагестан Республикасынынъ куьнлеринде республикадынъ социал-экономикалык оьрленуьв соравлары ойласылган.
Сонынъ алдында Москвада РФ авыл хозяйство министрининъ биринши орынбасары Джамбулат Хатуовтынъ Дагестан Оькиметининъ вице-премьери Абдулмуслим Абулмуслимов пан ис йолыгысы болып оьткен. Бу йолыгыста респуб- ликадынъ агропромышленность эм балык хозяйство комплекслерининъ оьрленуьви, солай ок авыл хозяйство тармакларынынъ маьнели маьселелери эм соларды шешуьв йоллары ойласылган. Шарадынъ барысында республикадынъ сырт ягындагы ерлердинъ кумланувынынъ маьселелерин шешуьв йоллары да аьзирленген.
Бу йолыгыс пан байланыста Ногай район администрациясынынъ аькимбасы Мухтарбий Аджеков оьз ойын айтып билдирген.
«Дагестан Республикасынынъ куьнлеринде ойласылаяк маьнели маьселелер санында Дагестаннынъ сырт ягындагы ерлердинъ кумланувы акында сорав да каралаяк. Соны ойласув Дагес- тан Республикасынынъ Аькимбасынынъ куллыгын юритуьвши Сергей Меликовтынъ аьрекети мен уйгынланады. Бу маьселе Федерация Советинде аьруьв этилинип ойласылаяк. Аьлиги заманда Россиядынъ авыл хозяйство министерствосы сондай маьселе мен байланыста туьзилген аьллерден тура навасызланувын билдирген. Тек янъыларда РФ Оькиметининъ Председатели Михаил Мишустин Калмыкия Республикасына ис йорыгы ман барувында ерлердинъ кумланувы бойынша туьзилген аьллер мен еринде ок танысып, бир неше тапшырмалар берген.

Ногай районы бу сорав ман байланыста айлак та авыр аьллерге туьскен районлардынъ бириси болады. Сонынъ уьшин район яшавшыларында ерлердинъ кумланувы акында Сергей Алимович оьзи коьтерген эм соны республикадынъ Оькиметининъ вице-премьери Абдулмуслим Абдулмуслимов армаган федераллык туьзилислери алдына элтеп салган маьселе федераллык органлары ман тергевге алынар деген уьйкен сенимлик тувады.
Буьгуьнлерде бу авыр маьселе бойынша аян ислер ягына каратылган федераллык программасы кабыл этилинип алынады. РФ Федерация Советинде болып оьткен Дагестан куьнлери коьп соравларды шешуьв ягыннан етимисли эм онълы болып озды деп сенемиз», – деген Ногай район администрациясынынъ аькимбасы.