Газетамыздынъ бетлеринде биз коьп кере окув, спорт, маданият эм сондай баска туьрли тармакларында баскаланган етимисли ясларымыздынъ акында язып келемиз. Буьгуьнги меним хабарым да етимисли окувшы кызымыз Альмида Арыкова акында болады. Альмида – асылы ман Саратов каласынынъ яшавшысы. Ол Алимжан эм Эльза Арыковлардынъ аьелинде тувып-оьскен. Алимжан Саратов каласындагы медучилищесининъ окытувшысы эм тис ясав устасы болады, анасы Эльза (Уразаева) Саратов педуниверситетининъ музыкалык факультетин окып битирип, балалар бавында суьйикли кесписин байырлаган. Альмида Терекли-Мектеб авылыннан Арсланбий эм Любовь Уразаевлердинъ куьезин оьстирген йиен кызы болады.
Альмида Арыкова буьгуьнлерде Саратов каласынынъ 31-нши номерли гимназиясынынъ 10-ншы классынынъ етимисли окувшыларынынъ бириси. Шалыскыр кыз гимназиядынъ ямагат яшавында белсенли катнасып, оьзи окыйтаган гимназия, кала, область, савлайроссиялык ярысларында, илми конференцияларында, туьрли олимпиадаларда катнасып, енъуьвши орынларынынъ иеси болып келеди.
Айтпага, янъыларда Альмида «ОС@-2023» деген Савлайроссиялык илми-практикалык конференциясынынъ «Аьдем экологиясы» боьлигинде енъуьвши болды. Солай болып, «Биз – 21-нши оьмирдинъ келеектегиси» деген муниципаллык илми-практикалык конференциясынынъ «Химия в быту» деген боьлигинде 1-нши орынга тийисли болувы ман «Российская школа фармацевтов» деген регионлар ара ярысынынъ финалына шыкты. Тезден йигерли кыз Санкт-Петербург каласында оьтеек Савлайроссиялык илми-практикалык конференцияда оьз билимлери мен сынаспага аьзирлик коьреди.
Мине етимисли окувшы кыздынъ акында йылы йоравлары ман онынъ окытувшысы Елена Усачева да булай деп боьлиседи:
– Мага коьп туьрли аьлемет окувшыларын окытпага туьсти, ама келеекте химия ман терен тар байланыс тутпага мырат эткен айырым окувшыларымыз да бар. Олар буьгьнлерде уьйкен сыйга, тийисли бийикликлерине етисип келедилер. Мен Альмида Арыковады сондай енъуьвлери мен ак юректен кутламага суьемен. Сен не ерде де уьлгиресинъ, мен сенинъ кайратлыгынъ, билимлеринъ мен аьжейипсинемен, бек аьперим! – дейди Альмидадынъ гимназиядагы окытувшысы Елена Усачева.
Альмидадынъ келеекте врач болмага уьйкен мырады бар. Окувшы кыз сол асыл мырадына етуьв уьшин куьн сайын билимлерин оьстирмеге шалысады. Альмида Санкт-Петербург патшалык медициналык университетине туьспеге мыратланады. Химия дериси бойынша савлайроссиялык илми-практикалык конференцияларында енъуьвлери етимисли кызга сол ойлаган мырадын яшавга айландырмага ашкыш болаягына соьз йок.
Мен де Альмидага окувында келеекте де бийик етимислерди, ойлаган мырады яшавга айланып барганын, алдыда йолы дайым ашык болганын йорайман!
Г.Нурдинова.
Суьвретте: Альмида Арыкова.