Дагестан Республикасынынъ кесек заманга куллыгын юритуьвши Сергей Меликовтынъ Оькимет сынавларында 100 балл алган выпускниклерге акшалай баргы берилуьв акында карары тек окувшылар эм окытувшылар сырасында тувыл, коьп баскалардынъ да эсин каратты деп, «Ногайский район» МР администрациясынынъ билимлендируьв боьлигининъ етекшиси, РФ ат казанган ярыкландырув эм тербиялав куллыкшысы Алтын Агаспарова белгилейди:

– ЕГЭ сынавларында 100 балл алган выпускниклерге эм олимпиада савгашыларына акшалай баргы берилуьвден тура республика етекшилигининъ карары келеекте баска выпускниклерге эм окувшыларга окувга бет беруьвге эм сынавларга ийги аьзирленуьвге демевлик этер. Бу карарда энъ де маьнелиси – билимлерге ымтылган окувшыларга эс этилинуьви.
Ногай районында бу йыл орыс тили бойынша ЕГЭ сынавларында Терекли-Мектеб авылынынъ А.Джанибеков эм Кадрия атындагы мектеблерининъ эки выпускниклери 100 балл алдылар. Олар – Айсель Кокурова эм Алина Кусепова. Орыс тилиннен ЕГЭ сынавларын Ногай районынынъ выпускниклери аьдетинше аьруьв бередилер, ама 100 балл биринши кере озган йыл алды.
Озган йыл 100 баллды А.Джанибеков атындагы мектебининъ выпускниги Алтынбике Боранова алган эди. Оькимет сынавларында 100 балл алган выпускниклерден оьзге, бизде 11 бала орыс тилиннен ЕГЭ сынавларда 90 эм оннан да артык баллар алганлар.
Оьзек те, йогары сырагыдынъ артында окувшылар, окытувшылар, солай ок ата-аналардынъ токтавсыз куллык этуьви турады.
Янъыларда Дагестан Аькимбасынынъ кесек заманга куллыгын юритуьвши Сергей Меликов Ногай районында болды, ол окувшылар эм окытувшылар ман бек йылы аьлде аьллести. Олар аьлиге дейим сол аьлемет йолыгысты эсине аладылар. Тагы да бизде янъы мектеблер салынып басланаяк. Бу баьри республика етекшилевининъ ийги аьрекетлери бизди Дагестаннынъ онъайлыгы уьшин ислемеге демевлик этеди», – деп хабарлайды Алтын Агаспарова «Шоьл тавысы» республикалык газетасынынъ корреспондентине.
Суьвретте: А.Агаспарова.