22-нши июнь – Уллы Аталык согысы басланатаган куьн Ногай район орталыгы Терекли-Мектеб авылдагы давда янын берген ердеслеримиздинъ эстелиги янында митинг болып озды. Митингте район етекшилери, ис коллективлери, ерли яшавшылар катнастылар.

Митингте район басшысы Джамалутдин Эсиргепов согыстан сонъ неше йыллар озувына да карамастан, биз фронт йоллары ман оьткен эм сонынъ баьри кыйынлыкларын басларыннан кеширген, ким келеектеги несиллер уьшин согыс эм ис йигитлигин эткенлердинъ оьлимсиз баьтирлиги алдында бас иемиз деп белгиледи.
Район етекшиси Россия буьгуьн де Куьнбатар эллердинъ шапкынлыгына карсы турганына эс этти. «СВО-да катнасатаган бизим аьскершилеримиз фашизм мен куьресип, эрлик эм йигитлик коьрсетип оьз атайларынынъ баьтирлигин тагы да кайтаралайдылар», – деди Д.Эсиргепов. Ол буьгуьн район еринде СВО-да янларын берген аьр бир ердесимизге эстеликли такталар ашылганын билдирди.
Митингте Ногай районнынъ Савытлы куьшлер, ыхтыяр саклавшы органлар эм ис ветеранлар советининъ председатели Акманбет Сангишиев те шыгып соьйледи.
Митинг ортакшылары Уллы Аталык согысында ян бергенлерди уьндемев такыйкасы ман эскердилер, эстеликке эм кардаш камырына шешекейлер салдылар.
Бизим хабаршы.