Совет Союзынынъ Баьтирлери эм аьскершилик «Данък» орденининъ толы иелери ишинде ногай халкынынъ йигерли увылы, Уллы Аталык согысынынъ катнасувшысы Алимхан Боранбай увылы Асановтынъ аты айырым сый эм куьез бен аталады. Ол Дагестан Республикасында сондай согыс савгасын алган 7 аьдемнинъ бириси болады. Быйылдынъ 23-нши сентябринде баьтир ердесимиз тувганлы 100 йыл толаяк эди.
Сондай эстеликли эм сыйлы яс пан байланыста Терекли-Мектеб авылынынъ Кадрия атындагы мектебинде Алимхан Асановтынъ балалары ман йолыгыс болып оьткен. Бу йолыгыска баьтир аьскершидинъ увыллары Камалдин эм Шамсудин, кызлары Апузар, Альфира эм Аминат, келини Уьлимет келдилер. Солай ок шарада мектебтинъ етекшилери, окытувшылары эм окувшылары катнастылар.
Мектебтинъ актовый залында шарадынъ басыннан ызына дейим йылы эм ийгилик йоравшы аьл туьзилип, согыс эм йигитлик акында ятлавлар, йырлар занъырадылар, Алимхан Асанов акында видеороликлер эм презентация коьрсетилди. Баслапкы соьзди айткан онынъ уьйкен увылы Камалдиннинъ эскеруьвлери йыйылган окувшылардынъ юреклерине тиймей болмады. Балалар согыс катнасувшысы акында айтылган хабарды уьйкен эс берип тынъладылар.
Муннан сонъ оьзининъ кайын атасы акында келини Уьлиметтинъ хабарлаганы да окувшыларды кызыксындырды. Онынъ айтувы ман, Алимхан Боранбай увылы мен деп коькирегине бир де какпаган, танъ юрекли, туврашыл, йол-йорыклы аьдем болган эм ол оны оьз атасындай этип баалаган.
Йогары класслардынъ окувшылары С.Янгишиева, С.Арсланов, О.Исмаилов, К.Мансурова шаир Анварбек Култаевтинъ «Алимхан» деген поэмасыннан уьзикти сценага салып коьрсеттилер. Солай ок «Вдохновение» деген яттан окувшылар кружогынынъ катнасувшылары Л.Наврузова, М.Абдулмусуарова, У.Узаиров, Н.Башантавов, Ф.Алыпка- чева, А.Толемишов бир неше ятлавларды сувдыратып окыдылар.
Бу йолыгыс шарасын аьзирлеген мектеб китапхана куллыкшысы Марина Межитова оьзининъ соьзинде мундай йолыгыслар оьткен согыста енъген аьскершилердинъ эстелигин оьмирлетуьв уьшин кайдай да бир косым этуьвимизди бизге сездиреди деди. Ол келген конакларга оьз баьтир аталары акында ийги эскеруьвлерин айтканы уьшин разылык билдирди.
М.Юнусов.
Суьвретте: йолыгыс аьсеринде.
