Буьгуьнлерде шынты эрлер – согыс спецоперациясы юрген ерде ортакшылык этуьви мен Элимиздинъ япсарларын коршалап келедилер. Буьгуьнги енъил болмаган куьнлерде ясларымыз Элимизде парахатлык эм тынышлык уьшин неонацистлери мен согыс оьзгерислери юрген ерде йигитлерше душпанлар ман согысып, кайбирерде оьз яслыгын эм яшавын да курман этедилер.
Согыс спецоперациясынынъ катнасувшысы, мотострелковый бригадасынынъ рядовойы Равиль Ринатович Кустяев увыт айынынъ 23-нши куьнинде Запорож областинде согыс борышын толтырувда йигитлерше янын берди.
Равиль асылы ман Астрахань областининъ Джанай авылыннан болады. Ерли мектебте билим алган, окувын Харабали каласында тамамлаган сонъ, 2016-ншы йыл Равиль Ринатовичти Аьскер сырасына шакырдылар. Яс аьскерлик борышын Архангельск областининъ ракеталар аьскеринде оьтти. Аьскер сырасыннан кайтканнан сонъ, Астрахань каласында туьрли куллыклар ман каьрлеп келген.
Толы болмаган мобилизация басланганда, йырма бес ясындагы Равиль Ринат увылы 2022-нши йылдынъ казан айында шакырув бойынша согыс спецоперация юрген ерине йол алды. Оьз аьскершилик борышын яваплы толтырды, етекшилеви мен берилген кайсы согыс борышларын да етимисли толтырып келди. Запорожский областинде согыс борышларын толтырувда коьрсеткен эрклиги эм йигерлиги уьшин яс Йигитлик ордени мен оьлгеннен сонъ тийисли этилди. Яс аьскершидинъ кайратлы аьрекетлеви мен онынъ согыс йолдасларынынъ яшавлары аман калдылар. Сол зат онынъ аьели, тувган-кардашлары эм савлайымыз уьшин де толтыргысыз йойым болады. Йигит баьтиримиз Равиль Кустяевтинъ бес ясындагы Эмин увылы атасыз, ата-анасы суьйикли увылсыз калды. Сондай баьтирлеримиздинъ, Украина еринде юрген согыс спецоперациясында катнасувшыларынынъ уьлгисинде биз тагы да яны авырыган эм Аталыгына алал болган аьдемлерин оьстируьв бек маьнели экенин анълаймыз. Олар Элимиз уьшин энъ баалы яшавын бергенлер. Равиль Ринатович согыс спецоперация юрисинде оьзин тийислисинше коьрсетип, йигитлерше янын курман этти.
Равиль Кустяевтинъ коьрсеткен Баьтирлиги бизим юреклеримизде эм оьсип келеятырган яс несилдинъ эсинде дайымга сакланар.
Г.Нурдинова.
Суьвретте: согыс спецоперациясында ян берген Равиль Кустяев.