Кайсы заманда да Элди коршалав Россия Федерациясынынъ гражданинининъ ваьлий эм бас борышларынынъ бириси болады. Аталыкты коршалав – йогары сый, уьйкен яваплылык деп саналады.
Йыл сайын язлык эм куьз шагында биз аьскер сырасына ясларымызды йолга саламыз. Савлай Россияда, сонынъ ишинде Ногай районында да, аьскершилик сырасына шакыртылув кампаниясы белсенли юреди. Ол коькек айынынъ биринши куьниннен алып шилле айынынъ 15-нши куьнине дейим оьтеек. Россия Аьскерининъ сырасында кызмет этуьви мен туьнегуьнги ясларымыз кайсы ягыннан да беркийдилер. Аьр бир аьдемнинъ яшавында сол кесек заман маьнели шагы болып эсте сакланады. Кайзаманда да ясларымызды аьскер сырасына Аталык алдында гражданлык борышын тийисли толтырув, аьскершиликтинъ йигитлик мектебин етимисли оьтуьв, аьскерде кызметининъ баьри авырлыкларын да басыннан йигерли озгарув деген йоравлары ман йолга салганлар. Призывниклерге оьзининъ йылы эм ийги йоравларын Кумлы авыл Д.М.Шихмурзаев атындагы орта мектебининъ баслангыш классларынынъ окытувшысы Тансык Кусеп кызы Картакаева багыслайды.
– Яс аьдемге россия халкынынъ тынышлык исин коршалавда турув – ол уьйкен сый эм оьрмет деп санайман. Аьр бир гражданин Элимиз алдында оьз борышын тийисли толтырмага борышлы. Аьскер сырасында кызмет кылув – эр аьдем уьшин оьктемлик болып калады. Ясларымыз савыт-садакты кулланувда сулубын оьстирип, шыдамлык, йигерлик пен баскаланып келедилер. Мен 70 ясымнан озганман эм оьз заманларында аьскер сырасында болган оьзимнинъ увылларым эм уныгым ман оьктемсимей болмайман.
Уьйкен увылым Эрадиль пограничный аьскер сырасында, Рустам Калининград каласында ерлескен тенъиз пехотада, Бийислам ман Ислам Читинский областинде танк эм уныгым Эмир ракета аьскерлеринде кызмет эткенлер. Уьйкен увылым аьскерде болувын айырым белгилегим келеди. Эрадиль аьскер сырасында биринши шешен согысы юрген мезгилде Дагестан ман Шешен Республикасы ман межеде 1994-нши йыл болган. Биз сол заман савлайымыз да ога бек тынышсызландык, ама сенимлигимиз акланды, ол уьйге аман эсен кайтты. Мен аьлиги ясларымызга Аталыгына аьдиллик пен кызмет эткенин, Элининъ шынты патриоты, йигит аьскерши болганын йорайман. Тезден меним Надир уныгым да аьскер сырасына йолланаяк. Келеекте Надир уныгымнынъ етимислери мен де оьктемсиекпен.
Баьри призывниклерине де, сонынъ ишинде Надирге де, Россия Аьскерининъ сырасында тийисли кызмет эткенди йорайман, – деп боьлиседи Кумлы авылынынъ Д.М.Шихмурзаев атындагы орта мектебининъ баслангшыш классынынъ окытувшысы Тансык Кусеп кызы Картакаева.
Аьзирлеген Г.Нурдинова.
Суьвретте:Т.Картакаева.
