Коьп йыллар артта яшавшылар янъылыклар, болган оьзгерислер акында телевизор аркалы эм газеталарды окып билгенлер. Сол заманларда баьри ясларды есирине алган Интернет болмаган. Дуныяда энъ де коьп газеталар эм журналлар Совет Союзында баспаланатаган болган. Газеталар эм журналлар Баспа министерствосынынъ тармагында болган Союзпечатьтинъ киоскларында сатылганлар. Сога коьре биз СССР-ды, алдынгы йылларды эсимизге алганда коьз алдымызга сол киоскларды аькелмей болмаймыз.

Белгиленген киоскларда газеталардан эм журналлардан оьзге калемлер, тептерлер эм коьп баска керекли затлар да сатылганлар. Сосы киосклар коьплердинъ янына якын болып та калган болар. «Баьри янъы зат, коьпте мутылган эски зат» деп босына айтылмаган экен. Келип турган янъы йылда Терекли-Мектеб авылынынъ А.Джанибеков атындагы мектебининъ азбарынынъ касында Дагпечатьтинъ янъы киоскы орынластырылды. Мунда, алдынгы йыллардагындай болып, газеталар, окув-язувга керекли алатлар сатылынаяк.
Н.Кожаева.