Йыл сайын аьдетке коьре октябрь айынынъ экинши каты куьнинде элимиз бойынша авыл хозяйство куллыкшылар куьни белгиленеди. Алдынгы заманларда бизде сол куьн эгиншилер, малшылар, сыйыр савувшылар, механизаторлар, агрономлар, зоотехниклер куллыгына сый этилинген болса, буьгуьнлерде авыл фермерлерининъ, арендаторларынынъ, байыр ярдамшы хозяйстволарынынъ иелерининъ, авыл хозяйство тармагы ман иси байланыслы баьри де куллыкшылардынъ аьрекети акында ийги соьзлеримизди айтамыз.
Дурысында да, элимиздинъ яшавын авыл хозяйство тармаксыз коьруьв кыйынлы. Политиклерге, олигархларга, чиновниклерге, окытувшыларга, медиклерге, баьрине де куьн сайын ашамага-емеге, кийинмеге керек. Сол берекет, элбетте, авыл хозяйство, тамак-азык эм асыллавшы промышленность куллыкшыларынынъ аьр куьнлик кыйын салувы аркасы ман аьзирленеди.
Сондай авыл куллыкшыларынынъ бириси – Адил Батырхан улы Махмудов. Ол Куьнбатар авылында тувган, мундагы орта мектебти кутарып, 1985-нши йылда Дагестан авыл хозяйство институтына окувга туьскен. Сонынъ ветеринарлык факультетин 1992-нши йылда битирген. Ол оьз кесписи бойынша ислемеге де болаяк эди. Болса да сол йылларда авыл яшавшыларына берилген ыхтыярга коьре фермер хозяйствосын туьзеди; бакша культураларын, пишен оьстиреди, мал саклайды. Аьлиги заманда оьз ерлеринде «Джеа» итальян люцерна культурасын оьстиреди. «Бу пишен оьсимлиги бизим ерде сув болса бек аьруьв оьседи», – дейди фермер. Сога йогары белгисин коьп район специалистлери де бередилер.
Адилдинъ атасы Батырхан Абдулмуслим улы да (Кудай ога тынышлык берсин) коьп йыллар узагында «Куьнбатар» совхозында экономист, партия организациясынынъ етекшиси, директордынъ орынбасары, директор болып куллык эткен. Анасы Зейнап Шатемир кызы Куьнбатар авыл мектебинде окытувшы болып ислеген. Солай болганда Адил де яслай авылшылардынъ танъ ярыгы ман каранъа аксамга дейим кыйын салувын оьз коьзлери мен коьрген. Сонъында уьйкен болганда ога да авыл куллыгы калай болатаганын оьз аркасы ман сезбеге туьсти. Буьгуьнлерде ол кедеси Абдул ман койлар асырайды. Койлардынъ бир хыйлысы оьристе багылады. Фермер оьзининъ азбарында мал беслев майданын да курган. Буьгуьнлерде сонда койлардынъ бир кесеги бесленеди.
Адил Махмудов авыл, район еринде болып оьтетаган коьп ямагат, спорт, саваплык ислеринде катнасады. 2016-ншы йылдан алып эгиншилер явы шегерткиге карсы кырларга дарманлар себуьв куллыгына спонсорлык ярдамын этеди. Тек янъыларда авылдаслары билимли кайратлы фермерди «село Кунбатар» СП МО Депутатлар йыйынына депутат этип сайлаганлар.
М.Юнусов.
Суьвретте: А.Махмудов.