Аьр бир инсанга оьз кишкей Аталыгы ювык эм аьзиз болады. Мен де тувган Уьйсалган авылымнынъ аьдемлерин сахнада коьрсем, юрегим оьктемликке толады. Соьйтип, Ногай патшалык фольклор-этнографиялык «Айланай» ансамблининъ артисти Каирбек Кокенеев – асылы ман Уьйсалган авылыннан. «Шоьл тавысы» газетадынъ редакциясына ислемеге келгенше, мен тувган авылымда баслап балалар бавында, сонъ мектебте иследим, сога коьре Каирбек меним тербияланувшым да, окувшым да болады. Аьлиги заманда ислейтаган куллыкларымыз да бир ерде орынласкан. Орамда коьрип калса, «Гульфира Абдулакимовна, амансыз ба» деп аманшылык сорайды, соьйтип авылды эсиме салады.

Каирбек «Айланай» ансамблинде 2008-нши йылдан алып ислейди. Оьнерли яс ислеген йыллары ишинде сулып йыйнап, сахнадынъ алдышы усталарынынъ санына кирди. Каирбек ансамбльдинъ коьплеген фольклор хореографиялык биювлеринъ солисти болады – «Ногай Эл», «Тоьгерек», «Маскарашыл», «Катар кыз», «Бабаюрт ногайлардынъ биюви», «Кайтарма». Аьлиги заманнынъ биюв композицияларында да катнасады артист. Соьйтип, «Домбыра», «Вена вальсы», «Хан Ногай» биювлеринде биз Каирбекти алды сырада коьремиз сахнада.
Каирбек юрегиннен оьткереди аьр бир биювди, кишкей спектакльде ойнагандай болып, ол аьр бир кол силтевине янын салады, анъ дуныясына коьмиледи.
Бизим халкымыздынъ данъклы биюв коллективи шет эллер эм Россия сахналарында шыгып, оьз оьнерин коьрсетеди, Каирбек ансамбль сырасында «Поволжье булаклары» деп аталган халклар ара фестивальде Чебоксары каласында катнасты, солай ок артист региональли Сырт Кавказ фольклор «Шоьлде дослык тавысы занъырайды» (Элиста каласы), халклар ара VI «Япсарлар дослар юреклерин айырмайдылар» (Атырау каласы), яслар «Студентлер язлыгы» (Ставрополь каласы), халклар ара «Кавказга тынышлык» (Майкоп каласы) фестивальлеринде туьрли йылларында ортакшылык эткен.
– Каирбек Кокенеев – талаплы, куллыксуьер артист. Ол оьз сулыбын арттырмага, яратувшылык байлыгын, оьз исининъ сырагылары уьшин яваплылыгын оьстирмеге шалысып ислейди. Ансамбльдинъ алдышы артисти, Каирбек йыл сайын халклар ара «Тавлылар» фольклор фестивалинде катнасады, – деп хабарлайды артист акында «Айланай» ансамблининъ етекшиси Мурат Ваисов.
Каирбек Кокенеев Ногай районында болатаган баьри маданият шараларында ортакшылык этеди. Оьзининъ усталыгын Каирбек балаларга коьширеди, коьп заман «Айланай» ансамблининъ балалар студиясында ислейди. Балаларды ийги анълайтаган, ол саьбийлерди тек бийип уьйретпейди, баска халклардынъ маданияты ман, ногай адабиаты ман таныстырады. Оьз сулыбы ман ис йолдаслары ман боьлиседи, ногай хореография дерислерин, мастер-класслар оьткереди. Ийги ислегени уьшин Каирбек Кокенеев Дагестан Республикасынынъ маданият министерствосы, Ногай район администрациясы атыннан Сый грамоталарга тийисли болган.
Биювши Мата Хари коьп заманлар артта айткан: «Биюв – ол поэма, онда аьр бир силтев – соьз». Мен Каирбекке келеекте коьп уьстинликлер йорайман, ол, аьр бир биюв мен усталыгын арттырып, аьр бир силтеви байыр биюв поэмасын язып, бизди сахнада суьйинткенин куьтип турамыз.
Г.Бекмуратова.
Суьвретте: К.Кокенеев кызы ман.